ސައުތު ސެންޓްރަލް ޕޮލިސް ރީޖަންގެ އަތޮޅު ޕޮލިސް ސްޓޭޝަންތަކުގައި މަސައްކަތްކުރަމުންދާ މުވައްޒަފުންގެ މެދުގައި އެކުވެރިކަމާއި ކުޅިވަރުގެ ރޫޙް ދިރުވާ އާލާކޮށް އަދި ދިވެހި ފުލުހުންނަކީ ދުޅަހެޔޮ ސިއްޙަތެއްގައި ތިބޭ ބައެއްގެ ގޮތުގައި ދެމެހެއްޓުމުގެ މަޤްޞަދުގައި ބާއްވާ ރީޖަނަލް ކޮމާންޑަރސް ފުޓްސަލް ކަޕް 2024 ކުޅެން ތައްޔާރުވެއްޖެއެވެ.

ޕޮއިންޓް އުސޫލުން ކުރިޔަށް ގެންދަން ހަމަޖެހިފައިވާ މި މުބާރާތުގައި ކޮންމެ ޓީމެއް ވެސް މި މުބާރާތުގައި ވާދަކުރާ އެހެން ޓީމުތަކާ ވާދަކޮށް ގްރޫޕް ސްޓޭޖުން އެންމެ ގިނަ ޕޮއިންޓް ހޯދާ ދެ ޓީމަށް ފައިނަލުން ޖާގަލިބޭނެއެވެ. މި މުބާރާތް ފަށަން ހަމަޖެހިފައިވަނީ މި މަހުގެ 23 ގެ ހަވީރު ކުޑަހުވަދޫ ޕޮލިސް ފުޓްސަލް ގްރައުންޑްގައެވެ.

ސައުތު ސެންޓްރަލް ޕޮލިސް ރީޖަން (މ،ފ، ދ، ތ އަދި ލ) ގެ އަތޮޅުގެ ރަށްތަކުގެ ޕޮލިސް ސްޓޭޝަންތަކުގައި މަސައްކަތް ކުރާ މުވައްޒަފުންނަށް ބައިވެރިވެވޭ މި މުބާރާތުގައި 5 ޓީމު ބައިވެރިވާނެއެވެ. އެއީ މ، ފ، ދ ، ތ އަދި ލ ޕޮލިސްއެވެ. މި މުބާރާތަކީ މި ސިލްސިލާގެ ދެވަނަ މުބާރާތެވެ. އަދި މި މުބާރާތް މިފަހަރު ހޯސްޓް ކުރަނީ ދ. ކުޑަހުވަދޫގައެވެ.

މުބާރާތުގެ މީމު ޕޮލިސް އިން ކުޅެން ހަމަޖެހިފައިވާ މެޗުތައް. ފޮޓޯ: މީމު ޕޮލިސް

މި މުބާރާތުގެ 2023 ވަނަ އަހަރުގެ އެޑިޝަން ކާމިޔާބުކޮށްފައިވަނީ ލާމު ޕޮލިހުންނެވެ. މި މުބާރާތުގެ އިތުރުން 2016 ގައި ވެސް ވަނީ މިފަދަ މުބާރާތެއް މީމުން ފެށިގެން އައްޑޫ ރީޖަން ފުލުހުންނަށް ހާއްސަކޮށް ބާއްވާފައެވެ. އެ މުބާރާތުގެ ޗެންޕިއަންކަން ނަގާފައިވަނީ ތާ އަތޮޅު ޕޮލިހުންނެވެ.