މަސްވެރިކަމާ ބެހޭ މާސްޓާރ ޕްލޭނެއް އެކުލަވާލުމަށް ބޭނުންވާ ފައިސާ ވޯރލްޑް ބޭންކުގެ އެހީގައި ހަމަޖެހުމުން އެކަމާބެހޭ މަސައްކަތް ފިޝަރީޒް މިނިސްޓްރީން ފަށައިފިއެވެ.

މަސްވެރިކަމާއި ކަނޑުގެ ވަސީލަތާއި ބެހޭ 25 އަހަރުގެ މާސްޓާރ ޕްލޭނެއް ހަދަން އެ ވުޒާރާއިން ނިންމާފައިވާއިރު ގައުމީ ތަރައްގީ ޕްލޭނެއް އެކުލަވާލުމުގެ މަސައްކަތް ވެސް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވަނީ ފައްޓަވާފައެވެ.

މަސްވެރިކަމުގެ ސިނާއަތް ތަރައްގީކޮށް ސިންދަފާތުކޮށް ކުރިއެރުވުމަށް ކުރާ ކަންތައްތަކަކީވެސް ދުރާލާ ރޭވި، ކުރެހިފައިވާ އިސްތިރާޖީ ޕްލޭނެއްގެ ދަށުން ކުރިޔަށްގެންދާ ކަންތައްތަކަށް ހެދުމަށްޓަކައި އެ ވުޒާރާއިން 25 އަހަރުގެ މަސްވެރިކަމާއި ކަނޑުތަކުގެ މާސްޓާރ ޕްލޭނެއް އެކުލަވާލުމަށް ނިންމާފައިވާކަމަށާއި، ރާއްޖޭގެ ތަރައްގީއަށް ކުރެވޭ ކަންކަމަކީ ރޭވިފައިވާ ޕްލޭނެއްގެ ދަށުން ކުރާ ކަންތައްތަކަށް ހެދުމަށްޓަކައި ގާނޫނަކުން ބާރުލިބޭ ގައުމީ ތަރައްގީގެ 20 އަހަރުގެ ޕްލޭނެއް އެކުލަވާލެވުމަކީ ރައީސް ޑރ.މުހައްމަދު މުއިއްޒުގެ ވައުދުފުޅެއް ކަމަށްވެސް ފިޝަރީޒް މިނިސްޓްރީން ވަނީ ހާމަކޮށްފައެވެ.

މި އަހަރުގެ މަސްވެރިންގެ ދުވަސް ކުލަގަދަކޮށް ފާހަގަ ކުރުމަށް ސަރުކާރުން އަންނަނީ މަސައްކަތް ކުރަމުންނެވެ.