އަލުން ދަނޑަށް' ޝިޔާރުގެ ދަށުން ސްޕޯޓްސް މިނިސްޓްރީ އާއި 90 ޕްލަސް ގުޅިގެން އިންތިޒާމް ކުރާ 90 ޕްލަސް ގޯލްޑް ކަޕް 2024 ގެ ރޭގައި ކުޅެވުނު މުބާރަތް ހުޅުވިމެޗުގައި ކުޑަހުވަދޫ އާއި ވާދަކޮށް ފުވައްމުލަކުން މޮޅުވެއްޖެއެވެ. ގަލޮޅު ދަނޑުގައި ރޭގައި ކުޅެވުނި މި މެޗު ފުވައްމުލަކުން ކާމިޔާބުކުރީ 3-1 އިންނެވެ.ރޭގެ މެޗުގައި ކުޑަހުވަދޫގެ ދެ ކުޅުންތެރިޔަކަށް ވަނީ ރަތްކާޑު ދައްކައި ދަނޑުން ފޮނުވާލާފައެވެ. މެޗުގެ 89 ވަނަ މިނެޓާއި ހަމައަށް ނަތީޖާ ހަމަހަމަ ކޮށް އޮތްއިރު، މެޗުގެ ފަހު މިނެޓާއި އިތުރު ވަގުތުގެ ތެރޭގައި ފުވައްމުލަކުންވަނީ ދެ ލަނޑުޖަހާ މެޗުން މޮޅުވެފައެވެ.

ރޭގެ މެޗަށް ދެޓީމުން ނިކުތްއިރު ފުރަތަމަ ޑިވިޝަނުގެ ތަޖުރިބާކާރު ކުޅުންތެރިން ދެ ޓީމުގައިވެސް ހިމެނިފައިވެއެވެ. އެގޮތުން ޓީސީގެ ކުރީގެ ކެޕްޓަން އަހްމަދު ރިލްވާން (ބެން) އާއި ކުރިން ގްރީން ސްޓްރީޓްސް އަށް ވެސް ކުޅުނު މުހައްމަދު ސާއިފް، ކުޑަހުވަދޫ ޓީމުގައި ހިމެނެ އެވެ. އަދި ފުވައްމުލަކު ޓީމުގައި ޔުނައިޓެޑް ވިކްޓަރީ އާއި އީގަލްސް އަށް ވެސް ކުޅުނު މޫސާ އަޒީމް ހަސަން އާއި ޓީސީގެ މުހައްމަދު ސާދު (ނިޒާރު) ހިމެނެ އެވެ. އަދި ދެވަނަ ޑިވިޝަނުގައި ކުރިން ނިއު ރޭޑިއަންޓަށް ވެސް ކުޅުނު ގާނާގެ ފޯވާޑް އޮއުސޫ ކޯފީ ވެސް ފުވައްމުލައް ޓީމުގައި ހިމެނެ އެވެ. ފުވައްމުލަކު ޓީމުގެ ކޯޗަކީ ކުރީގެ ޤައުމީ ޓީމުގެ ކުޅުންތެރިޔާ ސޮބާ އެވެ.

މި ގްރޫޕްގައި ދެން ހިމެނޭ ޓީމުތަކަކީ ފަރެސްމާތޮޑާ އާއި މީދޫގެ އިތުރުން ދިއްދޫއެވެ. މުބާރާތުގައި މިއަދު ހަވީރު ކުޅޭ މެޗުގައި ބައްދަލު ކުރާނީ ގދ. ފަރެސްމާތޮޑާ އާއި ދ. މީދޫ އެވެ.