ގައުމީ ހޭންޑް ބޯލް ޗެންޕިއަންޝިޕްގެ ފުރަތަމަ ޑިވިޝަންގެ ފިރިހެން ޗެންޕިއަންކަން ޖީބީ ސްޕޯރޓްސް އަދި އަންހެން ޑިވިޝަންގެ ޗެންޕިއަންކަން ރެޑް ހޯކްސް ހޯދައިފިއެވެ. މި މުބާރާތުގެ ފިރިހެން ޑިވިޝަންގެ ފައިނަލުގައި ޖީ.ބީ ސްޕޯރޓްސް ބައްދަލުކުރީ ފިއުޗާ އެސް.ސީ އާ ދެކޮޅަށެވެ. އަދި އަންހެން ފައިނަލުގައި ރެޑްހޯކްސް ނިކުތީ އޮރިކްސް އާ ދެކޮޅަށެވެ.

ފޯރިގަދަ ކުޅުމެއްފެނުނު ފިރިހެން ޑިވިޝަންގެ ފައިނަލުގައި ޖީ.ބީ ސްޕޯރޓްސް އިން ކާމިޔާބުކުރީ 35-34 އިންނެވެ. މި މުބާރާތުގެ ގްރޫޕް ސްޓޭޖުގައިވެސް މި ދެޓީމު ބައްދަލުކޮށްފައިވެއެވެ. އެ މެޗު 35-32 އިން ކާމިޔާބުކުރީ ފިޔުޗަރ އެސް.ސީ އިންނެވެ.

މުބާރާތުގެ އަންހެން ޑިވިޝަންގެ ފައިނަލް މެޗު ރެޑް ހޯކްސް އިން ކާމިޔާބުކުރީ 30-24 އިންނެވެ. މި ނަތީޖާއާއެކު މި މުބާރާތުގެ ތަށި ނިމިދިޔަ ދެ އަހަރު ކާމިޔާބު ކޮށްފައިވާ އޮރިކްސް އަށް ތަށި މިލްކު ކުރަން ލިބިފައިވާ ފުރުސަތު ވަނީ ގެއްލިފައެވެ.

މި ފަހަރުގެ މުބާރާތުގެ އަންހެން ޑިވިޝަންގައި ޖުމްލަ 3 ޓީމު އަދި ފިރިހެން ޑިވިޝަންގައިވެސް 3 ޓީމު ވާދަކޮށްފައިވެއެވެ. ނޭޝަނަލް ހޭންޑްބޯލް އެސޯސިއޭސަނުން އިންތިޒާމްކުރި މި މުބާރާތުގެ ދެ ޑިވިޝަންވެސް ކުރިޔަށް ގެންގޮސްފައިވަނީ ނޭޝަނަލް ހޭންޑްބޯލް ކޯޓުގައެވެ.