ތޮއްޑޫ ރިދަން އެކަޑަމީން މުޅި ރާއްޖެއަށް ހުޅުވާލައިގެން ބާއްވާ ރިދަން އެކަޑަމީ ޗެމްޕިއަންޝިޕްގައި މިއަހަރު ޖުމްލަ 31 ޓީމް ބައިވެރިވެފައިވާކަމަށް އޮންލައިން ނޫހެއް ކަމަށްވާ ވަރަ ނޫހުން ރިޕޯރޓްކޮށްފިއެވެ. މި މުބާރާތުގައި ބައިވެރިވުމުގެ މުއްދަތު ޖޫން 15 ވަނަ ދުވަހުގެ ނިޔަލަށް ހަމަވިއިރު، ހަތަރު އުމުރުފުރާއަކުން ޓީމުތައް ވަނީ ބައިވެރިވެފައެވެ.

މުބާރާތުގައި 10 އަހަރުން ދަށުގެ 6 ޓީމާއި، 12 އަހަރުން ދަށުގެ 5 ޓީމާއި، 14 އަހަރުން ދަށުގެ 9 ޓީމާއި، 17 އަހަރުން ދަށުގެ 11 ޓީމް ވާދަކުރާނެއެވެ. މިއީ ރިދަން އެކަޑަމީން ރާއްޖެއަށް ހުޅުވާލައިގެން މި މުބާރާތް ބާއްވާ ދެވަނަ އަހަރެވެ. މިދިޔަ އަހަރާ ޚިލާފަށް މިއަހަރުގެ މުބާރާތުގައި ފުޓްބޯޅައިގެ އިތުރުން ހޭންޑްބޯޅަ އަދި ބެޑްމިންޓަން ކުޅިވަރުތަކުގައިވެސް ބައިވެރިވުމުގެ ފުރުސަތު ވަނީ ހުޅުވާލާފައެވެ.

Ad by Hajj Corporation

ސެޕްޓެމްބަރު 21 އިން 27 އަށް ކުރިއަށް ގެންދިޔުމަށް ހަމަޖެހިފައިވާ މި މުބާރާތުގައި ޖުމްލަ 11 އެކަޑަމީއެއް ބައިވެރިވެފައިވެއެވެ. މީގެ ތެރޭގައި ކ.ގާފަރު ފިއުޗާ އެކަޑަމީ، ކ.މާފުށި ނިއު ސްޓާރސް ސްޕޯޓްސް ކްލަބް، އއ.ތޮއްޑޫ ރިދަން ސްޕޯޓްސް އެކަޑަމީ އަދި ރަސްދޫ ފުޓްބޯޅަ އެކަޑަމީ ފަދަ ގިނަ އެކަޑަމީތަކެއް ހިމެނެއެވެ.

މިއަހަރުގެ މުބާރާތުގެ 17 އަހަރުން ދަށުގެ ޗެމްޕިއަން ޓީމަށް 10,000 ރުފިޔާގެ ފައިސާގެ އިނާމެއް ދިނުމަށް ވަނީ ހަމަޖެހިފައެވެ. މީގެ އިތުރުން އެހެން އުމުރުފުރާތަކުގެ ޗެމްޕިއަން ޓީމުތަކަށްވެސް އެކި އިނާމު ދިނުމަށް ވަނީ ހަމަޖެހިފައެވެ. މިދިޔަ އަހަރުގެ މުބާރާތުގެ ޗެމްޕިއަންކަން ހޯދާފައިވަނީ ސަސް އެކަޑަމީން ކަމަށްވާއިރު، ރަނަރަޕް ޓީމަކީ ބީޖީ ސްޕޯޓްސް އެކަޑަމީއެވެ.