ބައިނަލްއަގްވާމީ މެޗުތައް ބޭއްވޭ ފެންވަރަށް ތަރައްގީކުރާ ސްޓޭޓް އޮފް ދަ އާޓް މަލްޓި ސްޓޯރީ އިންޑޯ ފުޓްސަލް ކޮމްޕްލެކްސްގެ އަމަލީ މަސައްކަތް މި މަހުގެ ތެރޭގައި ފަށާނެ ކަމަށް ކުޅިވަރާއި ހަށިހެޔޮކަމާ ބެހޭ ވަޒީރު އަބްދުﷲ ރާފިއު ވިދާޅުވެއްޖެއެވެ.

ކުޅިވަރު ވުޒާރާއިން ކުރަމުންދާ މަސައްކަތްތަކުގެ މައުލޫމާތު ހިއްސާކުރުމަށް ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ވަޒީރު ރާފިއު ވިދާޅުވީ، ރާއްޖެއިން ފުރަތަމަ ފަހަރަށް ފުޓްސަލްގައި ހޯދި ބައިނަލްއަގްވާމީ ކާމިޔާބީއާއެކު، އިންޑޯ ޕިޗެއް ނެތްކަމުގެ ކަންބޮޑުވުންތައް އިތުރުވެފައިވާ ކަމަށެވެ. އަދި މިފަދަ ވަސީލަތެއް ގާއިމްކުރުމަށް ސަރުކާރުން ކުރަމުންދާ މަސައްކަތްތައް ބާރުސްޕީޑުގައި ކުރިއަށްދާކަން ވަޒީރު ފާހަގަކުރެއްވިއެވެ.

Ad by Hajj Corporation

ވަޒީރު ވިދާޅުވީ، ފުޓްސަލް ކޮމްޕްލެކްސްގެ މަސައްކަތް ފެށުމަށް ބޭނުންވާ އެންމެހާ އިދާރީ ކަންކަން މިހާރު ހަމަޖެހިފައިވާ ކަމަށެވެ. "ﷲ ގެ އިރާދަފުޅާއެކު މި މަސް ތެރޭގައި އެތަނުގެ މަސައްކަތް ފެށިގެންދާނެ،" ވަޒީރު ވިދާޅުވިއެވެ. މި މަސައްކަތް މިހާރު ތާވަލު ކުރެވިފައިވަނީ ކުރިން އަންދާޒާކުރި ވަރަށްވުރެ އަވަހަށެވެ.

މި އަހަރުގެ ރިޔާސީ ބަޔާން އިއްވަވަމުން ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެފައިވަނީ މި މަޝްރޫއު އޭޕްރީލް މަހު ފައްޓަވާނެ ކަމަށެވެ. ރައީސް ވިދާޅުވި ގޮތުގައި މި ކޮމްޕްލެކްސް ބިނާކުރާނީ ފުޓްސަލް ސްޓޭޑިއަމެއްގެ އިތުރުން ހަތަރު ޓްރެއިނިންގ ޕިޗް ހިމެނޭ ގޮތަށެވެ. މިއީ ރާއްޖޭގައި ބައިނަލްއަގްވާމީ މުބާރާތްތައް ބޭއްވޭނެ ފެންވަރުގެ ޒަމާނީ ވަސީލަތަކަށް ވެގެންދާނެއެވެ.

ރާއްޖޭގައި އިންޑޯ ފުޓްސަލް ޕިޗެއް ނެތުމަކީ ފުޓްސަލް ކޮމިއުނިޓީގެ ވަރަށް ބޮޑު ޝަކުވާއެކެވެ. މި އައު ކޮމްޕްލެކްސްގެ ސަބަބުން ގައުމީ ފުޓްސަލް ޓީމުގެ ފެންވަރު މަތިކުރުމަށާއި، ބައިނަލްއަގްވާމީ މުބާރާތްތަކަށް ތައްޔާރުވުމަށް ބޮޑެތި ފަސޭހަތަކެއް ލިބިގެންދާނެއެވެ. މީގެ އިތުރުން، މިއީ ރާއްޖެއަށް ބައިނަލްއަގްވާމީ މުބާރާތްތައް ގެނައުމަށް ހުޅުވިގެންދާނެ މުހިންމު ދޮރެކެވެ.

ފާހަގަކޮށްލެވޭ ގޮތުގައި ރާއްޖެއަކީ މި ސަރަހައްދުގެ ފުޓްސަލްގައި އެންމެ ވަރުގަދަ އެއް ގައުމެވެ. އެގޮތުން، އެންމެ ފަހުން ބޭއްވި ފުރަތަމަ ސާފް ފުޓްސަލް ޗެމްޕިއަންޝިޕްގެ ތަށި ރާއްޖެއިން ވަނީ ކާމިޔާބުކޮށްފައެވެ.