އިސްރާއީލުގެ ޕާސްޕޯޓް މަނާކުރުމަށް ރައްޔިތުންގެ މަޖިލީހަށް ހުށަހަޅާފައިވާ ބިލުގެ މަސައްކަތް އަވަސްކުރުމަށް ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ އެމްޑީޕީގެ މެންބަރު މުހައްމަދު އިބްރާހިމް (ކުޑޫ) ހުށަހެޅުއްވި ގަރާރު ފާސް ނުކުރަން ޕީއެންސީގެ މެމްބަރުން ވޯޓު ދިނީ އެގަރާރަކީ މަޖިލީހުގެ މަސައްކަތްތަކުގެ ވަގުތު ނަގާލުމުގެ ބޭނުމުގައި އެއްވެސް ހެޔޮ ނިޔަތެއް ނެތި ހުށަހަޅަފައިވާ ގަރާރަކަށް ވާތީ ކަމަށް ޕީއެންސީ އިން ބުނެފި އެވެ.

އިސްރާއީލުގެ ޕާސްޕޯޓް މަނާކުރުމަށް ރައްޔިތުންގެ މަޖިލީހަށް ހުށަހަޅާފައިވާ ބިލުގެ މަސައްކަތް އަވަސްކުރުމަށް ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) ހުށަހެޅުއްވި ގަރާރު މަޖިލީހުން އިއްޔެ ވަނީ ބޭރުކޮށްލާފަ އެވެ. އެގަރާރު މަޖިލީހަށް ބަލައިގަތުމަށް ނެގި ވޯޓުގައި ގަރާރު ބަލައިގަންނަން ނުފެންނަ ކަމަށް 63 މެންބަރުން ވޯޓު ދެއްވި އެވެ. އަދި ފެންނަ ކަމަށް ވޯޓު ދެއްވީ 15 މެންބަރުންނެވެ.

އެކަމާ ގުޅިގެން ކުރިމަތިވި ފާޑު ކިޔުންތަކާ ގުޅިގެން ޕީއެންސީން ނެރުނު ބަޔާނެއްގައި ބުނީ އެމްޑީޕީގެ މެމްބަރު މުހައްމަދު އިބްރާހީމް ހުށަހެޅުއްވި ގަރާރު ހުށަހެޅުއްވީ އެއްވެސް ހެޔޮނިޔަތެއް އޮވެގެން ނޫން ކަމަށާ އެއީ މަޖިލީހުގެ މަސައްކަތްތަކުގެ ވަގުތު ނަގާލުމުގެ ބޭނުމުގައި ހުށަހެޅި ގަރާރެއް ކަމަށެވެ.

ޕީއެންސީގެ ބަޔާނުގައި ބުނެފައިވަނީ އިޒްރޭލުން ފަލަސްތީނުގެ ރައްޔިތުންނާ ދެކޮޅަށް ހިންގަމުންދާ ލާއިންސާނީ ނަސްލުނައްތާލުމުގެ އަމަލުތައް ބައިނަލްއަގުވާމީ މަސްރަހުގައި ކުށްވެރިކޮށް ފަލަސްތީނުގެ ރައްޔިތުންގެ ހައްގުގައި އެންމެ ވަރުގަދައަށް ވަކާލާތު ކުރެއްވި އެއް ލީޑަރަކީ އަދުގެ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކަމަށެވެ. އަދި އިރުމަތީ ގުދުސް ވެރިރަށެއްގެ ގޮތުގައި އޮންނަ މިނިވަން މުސްތަގިއްލު ފަލަސްތީނު ދައުލަތެއް ގާއިމުކުރުމަށާއި، ޣައްޒާއަށް އިންސާނީ އެހީތެރިކަން ހުއްޓުމެއް ނެތި ފޯރުކޮށްދެވޭނެ ނިޒާމެއް ގާއިމުކުރުމަށާއި، އިސްރާއީލުގެ އަނިޔާވެރި އަމަލުތަކާމެދު ޖަވާބުދާރީކުރުވުމަށްވެސް އެންމެ ބޮޑަށް ވަކާލާތު ކުރައްވަނީ ރައީސް ކަމަށްވެސް އެބަޔާނުގައި ބުނެފައިވެ އެވެ.

އެންމެ ވަރުގަދައަށް ވަކާލާތުކުރައްވާ އެއް ލީޑަރަކީ ރައީސް ޑރ. މުހައްމަދު މުއިއްޒު ކަމަށް އެ ބަޔާނުގައި ފާހަގަކޮށްފައިވެ އެވެ. ފަލަސްތީނު ރައްޔިތުންނަށް ދިވެހި ސަރުކާރާއި ރައްޔިތުންގެ ފަރާތުން އެންމެ ބޮޑު މާލީ އެހީތެރިކަމެއް މިހާތަނަށް ވެދިނީވެސް އަދި ފަލަސްތީނު ރައްޔިތުންގެ ހައްގުގައި މީގެ ކުރީން ރާއްޖޭގެ ވެރިއަކު ވަކާލާތު ނުކުރައްވާ ވަރަށް ރައީސް ޑރ.މުއިއްޒު ވަކާލާތު ކުރައްވާކަން އެބަޔާނުގައި ފާހަގަ ކޮށްފައިވެ އެވެ.

ޕީއެންސީން ބުނީ އިސްރޭލު ޕާސްޕޯޓު މަނާކުރުމުގެ ބިލުގެ މަސައްކަތް އެކަމާ ގުޅޭ މާހިރުންގެ ލަފައާއި އިރުޝާދާއެކު، ކަނޑައަޅާފައިވާ ތާވަލާ އެއްގޮތަށް އެ މަސައްކަތް ނިންމާނެ ކަމަށެވެ. އަދި ރައީސް މުއިއްޒާއި އެ ޕާޓީ އަބަދުވެސް ދެމި އޮންނާނީ ފަލަސްތީނުގެ ރައްޔިތުންނާއެކީ ކަމަށް ވެސް އެ ބަޔާނުގައި ބުނެފައިވެ އެވެ.

އިޒްރޭލުގެ ޕާސްޕޯޓު އޮންނަ މީހުން ރާއްޖެ އަށް އެތެރެވުން މަނާކުރުމަށް އިމިގްރޭޝަން ގާނޫނު ބަދަލުކުރަން މިދިޔަ މޭ މަހުގެ 30 ވަނަ ދުވަހު މަޖިލީހަށް ހުށަހެޅުއްވީ ގަލޮޅު ދެކުނު ދާއިރާގެ އެމްޑީޕީގެ މެންބަރު މީކާއިލް އަހުމަދު ނަސީމެވެ. އެ ބިލު މަޖިލީހަށް ބަލައިގެންފައި ވަނީ ޖޫން މަހުގެ 10 ވަނަ ދުވަހު އެވެ. އެދުވަހު ބިލު ކޮމެޓީއަށް ފޮނުވި ގޮތަށް އޮތީ މަޑުޖެހިފަ އެވެ. ބިލުގައިވާގޮތުން އިސްރާއީލްގެ ރައްޔިތުންނާއި އިސްރާއީލުގެ ޕާސްޕޯޓު ގެންގުޅޭ އެހެން ގައުމުތަކުގެ ރައްޔިތުންނަށް ވެސް ރާއްޖެ އެތެރެއެއް ނުވެވޭނެއެވެ.