ޓީޗަރުންގެ ފަންނީ ޤާބިލުކަން އިތުރުކުރަން ޚާއްޞަ ސެންޓަރުތަކެއް އަޅަން ނިންމާފައިވާ ކަމަށް އެޑިޔުކޭޝަން މިނިސްޓަރު ޑރ. އިސްމާއިލް ޝަފީޢު ވިދާޅުވެއްޖެއެވެ.

ޕީއެސްއެމްގައި ވާހަކަ ދައްކަވަމުން ޑރ. އިސްމާއިލް ވިދާޅުވީ، އެޑިއުކޭޝަން ސެންޓާ ފޯ އެކްސެލެންސްގެ ނަމުގައި ސެންޓަރުތަކެއް ރާއްޖޭގެ އެކި ސަރަހައްދުތަކުގައި އަޅަން ނިންމާފައިވާ ކަމަށެވެ.

މިނިސްޓަރު ދޭ ވިދާޅުވީ، އެ ސެންޓަރު ތަކުގެ ސަބަބުން ޓީޗަރުންނަށް ބޭނުންވާ ޕްރޮފެޝަނަލް ޑިވެލޮޕްމަންޓާއި ޕްރިންސިޕަލުންނަށް ބޭނުންވާ ޕްރޮފެޝަނަލް ޑިވެލޮޕްމަންޓަށް ކުރަން ޖެހޭ މަސައްކަތްތަކުގެ އިތުރުން ސްކޫލު އިވެލުއޭޝަނަށް ކުރަން ޖެހޭ މަސައްކަތް އެ ސެންޓަރު ތަކުގެ ސަބަބުން މިއަށް ވުރެ ހަރުދަނާވެގެން ދާނެ ކަމަށެވެ.

ތައުލީމީ ދާއިރާގައި މިހާރު ކުރެވެމުންދާ މުހިންމު ކަންތައްތަކަށް އަލިއަޅުވައިލައްވައި މިނިސްޓަރު ވިދާޅުވީ، މިހާރު ބޭނުން ކުރާ މީމިސްގެ ބަދަލުގައި ދަރިވަރުންގެ ތައުލީމީ ރެކޯޑު ބަލަހައްޓާނެ އާ ސިސްޓަމެއް ތައާރަފްކުރުމުގެ މަސައްކަތް ކުރަމުން އަންނަ ކަމަށެވެ. ދަރިވަރުންގެ ރިކޯޑްސްތަކާއި ކަންކަން ނިމުމުގައި ބޭނުންވާ މަޢުލޫމާތުތައް ފަސޭހައިން މި ސިސްޓަމްގެ ތެރެއިން ލިބޭނެކަމުގެ ޔަޤީންކަން އެޑިޔުކޭޝަން މިނިސްޓަރު ވަނީ ދެއްވާފައެވެ.

ރާއްޖޭގެ ސްކޫލްތަކަށް ބޭނުންވާ ޓީޗަރުން ތަމްރީނު ކުރުމުގެ މަސައްކަތް ފަށާފައިވާއިރު އަމާޒަކީ އަހަރަކު 150 ޓީޗަރުން މަދުވެގެން ތަމްރީނު ކުރެއްވުން ކަމަށް މިނިސްޓަރު ވިދާޅުވިއެވެ.