އެޑިޔުކޭޝަން މިނިސްޓަރު ޑރ. އިސްމާޢީލް ޝަފީޢު، މާލޭގެ ތިން ސްކޫލެއްގެ މުދައްރިސުންނާ ބައްދަލުކުރައްވައި، މުދައްރިސުންނަށް ދިމާވާ ދަތިތަކާ ގުޅޭގޮތުން މަޝްވަރާކުރައްވައިފިއެވެ.

އެޑިއުކޭޝަން މިނިސްޓްރީން ކުރި ޕޯސްޓެއްގައި ބުނީ މި ބައްދަލުވުމުގައި ބައިވެރިވެފައިވަނީ އަމީނިއްޔާ ސްކޫލާއި، އިސްކަންދަރު ސްކޫލް އަދި ސެންޓަރ ފޮރ ހަޔަރ ސެކަންޑަރީ އެޑިޔުކޭޝަން-މާލޭގެ މުދައްރިސުންކަމަށެވެ.

މި ބައްދަލުވުމުގައި މިނިސްޓްރީން ކުރިއަށްގެންދާ މުހިންމު މަސައްކަތްތަކާ ބެހޭ މައުލޫމާތު މުދައްރިސުންނާ ހިއްސާކޮށްފައިވެއެވެ. މިދިޔަ ބުރާސްފަތި ދުވަހު ބޭއްވި މި ބައްދަލުވުމުގެ މައިގަނޑު މަޤްސަދަކީ މުދައްރިސުންނަށް ދިމާވާ ދަތިތައް ދެނެގަނެ، އެ ކަންކަން ޕޮލިސީ ފެންވަރުގައި ހައްލުކުރުމަށް ކުރެވިދާނެ ކަންކަމާމެދު މަޝްވަރާކުރުންކަމަށް މިނިސްޓްރީން ބުނެފައިވެއެވެ.

އެޑިޔުކޭޝަން މިނިސްޓްރީން ފާހަގަކުރާ ގޮތުގައި މި ބައްދަލުވުމުގައި މުދައްރިސުންގެ ފަރާތުން ވަރަށް މުހިންމު ޚިޔާލުތަކާއި ހުށަހެޅުންތައް ލިބިފައިވެއެވެ. އަދި މި ހުށަހެޅުންތަކަށް ރިއާޔަތްކޮށް، ކުރިއަށް އޮތް ތަނުގައި މުދައްރިސުންނަށް ދިމާވާ ދަތިތައް ހައްލުކުރުމަށް މިނިސްޓްރީން މަސައްކަތްކުރާނެ ކަމަށް ބުނެފައިވެއެވެ.