ޣައިރު ގާނޫނީ ދައުލަތް ޔަހޫދީ ދައުލަތުގެ ބޮޑުވަޒީރު ބިންޔާމީން ނަަތަންޔާހޫ އާއި ކުރީގެ ދިފާއީ ވަޒީރު ޔޯވް ގަލަންޓް ހައްޔަރިކުރުމުގެ އަމުރެއް ބައިނަލްއަގްވާމީ ޖިނާއީ ކޯޓުން ނެރެފިއެވެ.

މިއަދު ހަވީރު ނެރުނު އަމުރުގައި މި މީހުން ހައްޔަރުކުރަން އަންގާފައިވަނީ ހަނގުރާމައިގެ ޖަރީމާ ހިންގާކަމަށް ބުނެއެވެ.

ކޯޓުގެ އިސް ޕްރޮސިކިޔުޓަރު ކަރީމް ޚާންގެ އޮފީހުން ވަނީ ނަތަންޔާހޫއާއި ގަލަންޓްގެ އިތުރުން ފަލަސްތީނުގެ މިނިވަން ކަމަށް ޖިހާދު ކުރަމުންދާ ހަމާސް ޖަމާއަތުގެ އިސް ތިން ވެރިއަކު ހައްޔަރު ކުރުމަށްވެސް އަމުރު ނެރުމަށް ވެސް މަސައްކަތް ފަށަފައެވެ. އޭގެ ތެރެގައި ހިމެނެނީ ޝަހީދުކޮށްލާފައިވާ ހަމާސްގެ ކުރީގެ ވެރިޔާ އިސްމާޢީލް ހަނިއްޔާއާއި، ހަނިއްޔާގެ ފަހަށް ހަމާސްގެ ވެރިކަމާ ހަވާލުވި ޔަޙްހާ ސިންވާރާއިގެ އިތުރުން ހަމާސްގެ އަސްކަރީ ވެރިޔާ މުޙައްމަދު އަލް-މަޞްރީއެވެ.ހަނިއްޔާއާއި ޔަހުޔާ ސިންވާރު ޝަހީދުކޮށްލާފައިވުމުން މިހާރުވަނީ މުޙައްމަދު އަލް-މަޞްރީ ހައްޔަރު ކުރުމުގެ އަމުރެއް ނެރެފައެވެ.

ނަަތަންޔާހޫ އާއި ޔޯވް ގަލަންޓް ހައްޔަރުކުރުމުގެ އަމުރަކަށް ފަނޑިޔާރުންގެ ކިބައިން އައިސީސީން އެދިފައިވަނީ މެއި މަހުގެ ތެރެގައެވެ. އައިސީސީއަކީ ހަނގުރާމައިގެ ކުށްތަކާއި، ގަތުލުއާންމުތަކުގެ މައްސަލަތައް ބަލާ ދުނިޔޭގެ އެންމެ މަތީ ކޯޓެވެ. މި ކޯޓު ވުޖޫދުވެފަިއވަނީ 2002 ވަނަ އަހަރުއެވެ.

މި ކޯޓުގެ އަމުރުތައް ތަންފީޒުކުރުމަކީ މެމްބަރު ގައުމުތަކަށް ލާޒިމްކަމަކަށް ވީނަމަވެސް އެންމެ އެދެވޭގޮތުގައި އެ އަމުރުތަް ތަންފީޒުވެގެން މިވީހާތަނަށް އައިސްފައެއްނުވެއެވެ.