މިހާރު ގަލޮޅު ދަނޑުގައި ކުރިޔަށްދާ ބޮޑު ފުޓްބޯޅަ މުބާރާތް 90 ޕލްސް ގޯލްޑް ކަޕްގައި ރޭޣައި ތިމަރަފުއްޓާއި ވާދަކޮށް މާލެއިން ބޮޑު މޮޅެއް ހޯދައި އެ ޓީމުގެ ފެންވަރު ދައްކާލައިފިއެވެ. މި މެޗު މާލެއިން ކާމިޔާބުކުރީ 4-0 ގެ ތަފާތު ބޮޑު ނަތީޖާއަކުންނެވެ.

ރޭގެ މެޗަށް ނިކުތްއިރި ދެ ޓީމުގައިވެސް ތަޖުރިބާކާރު ގިނަ ކުޅުންތެރިންތަކެއް ހިމެނިފައިވެއެވެ. އެގޮތުން މާލޭ ޓީމުގައި އީގަލްސް އަށް ކުޚެފައިވާ ރިލްވާން ވަޙީދު (ރިލޭ) އާއި ޤައުމީ ޓީމުގެ ކުޅުންތެރިޔެއް ކަމުގައިވާ އަޙްމަދު މާއިޝް އާއި ސައިފުއްﷲ އިބްރާޙީމް އާއި ވެލެންސިޔާގެ ކެޕްޓަން ހަސަން ސުފިޔާނު ވެސް މާލެޓީމުގައި ހިމެނިފައިވެއެވެ. މާލެ ޓީމުގެ ކެޕްޓަނަކީ އަޙްމަދު ރިލްވާން އެވެ.

ތިމަރަފުއްޓަށް ކުޅުނު ކުޅުންތެރިންގެ ތެރޭގައި ހިމެނެނީ އަބްދުﷲ ޒިޔާން (ޖަންކީ) ގެ އިތުރުން ޔުނައިޓެޑް ވިކްޓްރީގެ ޝަނާން ރަޝާދު އާއި އަބްދުﷲ ޖުނައިދުއެވެ. މި ދެ ކުޅުންތެރިން ތިމަރަފުއްޓަށް ކުޅެފައިވަނީ ބޭރު ކުޅުންތެރިންގެ ގޮތުގައެވެ. އެގޮތުން ޝަނާން ރަޝާދަކީ ކ. ގާފަރަށް ނިސްބަތްވާ ކުޚުންތެރިޔެކެވެ. އަދި އަބްދުﷲ ޖުނައިދުއަކީ ލ. ގަމަށް ނިސްބަތްވާ ކުޚުންތެރިއެކެވެ.

ރޭގެ މޮޅާއެއެކު ފައިދާ އެއް ގޯލުގެ ތަފާތުން މާލޭގެ ޓީމު އޮތީ ގްރޫޕް އޭގެ އެއްވަނައިގައެވެ.

މި މުބާރާތުގައި މިއަދުވެސް ދެ މެޗު ކުޅޭނެއެވެ. އެގޮތުން މިއަދު ހަވީރު ކުޅޭ މެޗުގައި ބައްދަލުކުރާނީ އޭދަފުއްޓާއި ތުޅާދޫއެވެ. އަދި މިރޭގައި ކުޅޭ މެޗުގައި ބައްދަލުކުރާނީ އައްޑޫސިޓީއާއި ކުރެންދޫއެވެ.