މިހާރު ގަލޮޅު ދަނޑުގައި ކުރިޔަށްދާ ބޮޑު ފުޓްބޯޅަ މުބާރާތް 90 ޕްލަސް ގޯލްޑް ކަޕްގައި އަލީ ނަސީމް ގެ ހެޓްރިކާއެކު އޭދަފުށިން ތުޅާދޫ ބަލިކޮށްފިއެވެ. މިމެޗުން އޭދަފުށި މޮޅުވީ 5-1 އިން ނެވެ.

އެގޮތުން މެޗުގެ ކުރީކޮޅުގައި އޭދަފުށިންވަނީ ގޯލުޖަހާފައެވެ. އަދި މެޗުގެ ފުރަތަމަ ހާފު ނިމުނު އިރު އިތުރު 2 ގޯލު ޖަހާ ނަތީޖާ ވަނީ 3-0 އިން ކުރީގައެވެ. ފުރަތަމަ ހާފުގެ އޭދަފުށީގެ ގޯލުތައް ޖަހާފައިވަނީ ޓީސީގެ ކެޕްޓަން އަޖުފާން އާއި އަހުމަދު ޖައުޝަންގެ އިތުރުން އަލީ ނަސީމް އެވެ.

ދެވަނަ ހާފުގައި ތުޅާދޫއިން މެޗުގެ ތެރެއަށް ވަންނަން މަސައްކަތުން ވަނީ އެއް ގޯލު ޖަހާފައެވެ. މި ގޯލު އެޓީމަށް ކާމިޔާބުކޮށްދިނީ ލިބުނު ޕެނަލްޓީއަކުންނެވެ.

މެޗުގެ ބޮޑުބައެއް ކޮންޓްރޯލްކޮށްގެން ކުޅުނު އޭދަފުށީގެ އަލީ ނަސީމް ވަނީ މެޗު ނިމުމުގެ ކުރިން އިތުރު ދެ ގޯލު ޖަހާ ހެޓްރިކް ހަމަކޮށްފައެވެ.

މިއީ މު މުބާރާތުގެ ގްރޫޕް ބީ ގެދެވަނަ މެޗެވެ. މީގެ ކުރިން މި ގްރޫޕް ގައި މާލެ ސިޓީ ވަނީ ތިމަރަފުއްޓާ ވާދަކޮށް 4-0 ގެ ނަތީޖާއަކުން މޮޅުވެފައެވެ.

މި މެޗުގެ އިތުރުން މު މުބާރާތުގެ ގްރޫޕް ސީގެ މެޗެއްވެސް ވަނީ ރޭގައި ކުޅެފައެވެ. އެ މެޗުގައި ބައްދަލުކޮށްފައިވަނީ ކުރެންދޫއާއި އައްޑޫ ސީޓީއެވެ.