ޑޮލަރު މާރުކުރުމުގެ އުސޫލަށް ގެނައި ބަދަލާއެކު ރައްޔިތުންނަށް އޮޅުވާލައިގެން އިދިކޮޅު އެމްޑީޕީން ތައްޔާރުވީ 4 ވަނަ ބަޣާވާތެއް ކުރުމަށްކަމަށް ފޭދޫ ދާއިރާގެ ކުރީގެ މެމްބަރު އަދި ޕީއެންސީގެ ސެނެޓް މެމްބަރު މުހައްމަދު ނިހާދު ވިދާޅުވެއްޖެއެވެ.

މެމްބަރު މިފަދައިން ވިދާޅުވީ މެންދުރު ޓީވީގެ މައުޟޫ ޕްރޮގްރާމުގައި ވާހަކަފުޅު ދައްކަވަމުންނެވެ.

މެމްބަރު ވިދާޅުވީ މިދިޔަ ސަރުކާރުގައިވެސް ޑޮލަރުގެ މާރުކުރުމުގެ ސިޔާސަތަށް ބަދަލު ގެނައުމަށް ނިންމިކަމަށެވެ. ނަމަވެސް ރިޔާސީ އިންތިހާބު ބޯމަތިވެފައި އޮތުމާއެކު އެ ސަރުކާރުން ނިންމީ އެ ދަނޑިވަޅަށް ޑޮލަރު މާރުކުރުމުގެ އުސޫލު ފާސްކުރުން މަޑުޖައްސާލަންކަމަށް މެމްބަރު ނިހާދު ވިދާޅުވިއެވެ.

ރިޔާސީ އިންތިހާބު ބޯމަތިވެފައިވާތީ ރާއްޖޭގެ ވިޔަފާރިވެރިން ދެކޮޅުވެދާނެތީ އެމްޑީޕީއަށް އެކަން ކުރަން ނުކެރުނީ. ގަބޫލުކުރެވުނީ މަހުޖަނުން ތިމަންނާ މެންނާ ދެކޮޅު ހަދާ އިދިކޮޅު ކެންޑިޑޭޓަށް ވާގިވެރިވެދާނެއޭ. ފަންޑުކުރާނެއޭ. އިންތިހާބު ކާމިޔާބުކޮށްފައި ފުރަތަމަ 6 މަހު އެކަން ކުރަން އޮތީ ރާވާފައި. އޭރުގެ ފިނޭންސް މިނިސްޓަރާއި އިކޮނޮމިކް މިނިސްޓަރު މަޝްވަރާކޮށްފައި ރައީސް ސާލިހާ ހަމައަށް ދިޔަ މިކަން. "

ޑޮލަރުގެ މައްސަލައިގައި އިިކޮޅު ފަރާތްތަކުން ފަތުރަމުންދަނީ ދޮގު ވާހަކަތަކެއްކަން ހާމަކޮށް މެމްބަރު ނިހާދު ވިދާޅުވީ ޑޮލަރޭ ކިޔައިގެން އަނެއްކާވެސް ގައުމު ސިޔާސީ ހަލަބޮލިކަމެއްގެ ތެރެއަށް ވައްޓާލެވިދާނެކަމަށް އެމްޑީޕީން ހީކުރިކަމަށެވެ.

" މުޅި ސަރުކާރު ވައްޓާލުމަށްޓަކައި އަނެއްކާވެސް ޑޮލަރެއްގައި ހިފައިގެން މަސައްކްތަފެށީ. 4 ވަނަ ބަޣާވާތެއް ކުރަން އުޅުނީ. އެކަން ނުވީ ރައީސްގެ ހިކުމަތްތެރިކަމުގެ ސިޔާސާތުގެ ތެރެއިން ."

އެމްއެމްއޭއިން ވަނީ 1 އޮކްޓޯބަރު 2024 އިން ފެށިގެން ޑޮލަރު މާރުކުރުމުގެ އުސޫލަށް ބަދަލުގެނެސް، ބޭރުފައިސާ އާއި ބެހޭ ޤަވާޢިދު އަލުން އާންމުކޮށްފައެވެ. މި ގަވާއިދުގައިވާ ގޮތުން، ޓޫރިޒަމް ދާއިރާގެ ހުރިހާ ފެސިލިޓީތަކަކުން ވެސް ކަނޑައަޅާފައިވާ ވަކި އަދަދެއް ބޭންކުތައް މެދުވެރިކޮށް މާރުކުރަން ޖެހޭނެ އެވެ. ކެޓަގަރީ "އޭ" ގައި ހިމެނެނީ ރިސޯޓުތަކާއި ހޮޓާތަކާއި ޓޫރިސްޓް އުޅަނދުތަކެވެ. އެ ކެޓަގަރީގައި ހިމެނޭ ފަރާތްތަކުން ކޮންމެ ޓޫރިސްޓަކަށް ބޮލަކަށް 500 ޑޮލަރުގެ ރޭޓުން، ރާއްޖޭގެ ބޭންކަކަށް ޖަމާކުރަން ލާޒިމްވާނެ އެވެ. ކެޓަގަރީ "ބީ" ގައި ހިމެނެނީ ގެސްޓް ހައުސްތަކުން ކޮންމެ ޓޫރިސްޓެއްގެ ބޮލަކަށް 25 ޑޮލަރުގެ ރޭޓުން ކޮންމެ މަހަކު އެ އަދަދު ބޭންކަކަށް ޖަމާކޮށް މާރުކުރަން ޖެހެ އެވެ.

މި ފައިސާ މާރުކުރަންޖެހޭނީ އެ މަހެއްގައި އައި ޓޫރިސްޓުން ހިސާބުކުރުމަށްފަހު އެ މަސް ނިމޭ ދުވަހުން ފެށިގެން ތިންވަނައަށްވާ މަހުގެ 28 ވަނަ ދުވަހުގެ ކުރިން ކަމަށްވެސް ގަވާއިދުގައި ބަޔާންކުރެ އެވެ.