ރާއްޖޭގެ ފަތުރުވެރިކަމަށް އަދި އިގްތިސާދަށް ފޫނުބެއްދޭ ވަރުގެ ގެއްލުމެއް ލިބޭނެ ކަމެއް ރާއްޖޭގެ ސިޔާސީ ޕާޓީއަކުން އަދި އެއްވެސް ޖަމިއްޔާއަކުން ވެސް ނުކުރާނެ ކަމުގައި ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) އިން ބުނެފިއެވެ.

ޕީއެންސީން އެފަދައިން ބުނީ، ރޭ ޕީއެންސީގެ ޖަގަހަ ޖަލްސާގައި ޓޫރިޒަމް މިނިސްޓްރީގެ ސްޓޭޓް މިނިސްޓަރު އަދި ފޭދޫ ދާއިރާގެ ކުރީ މެންބަރު މުޙައްމަދު ނިހާދު ދެއްކެވި ވާހަކަފުޅާ ގުޅިގެން މިއަދު ނެރުނު ބަޔާނެއްގައެވެ.

އެގޮތުން ރޭ ނިހާދު ވިދާޅުވީ، އެމްޑީޕީގެ ވެރިކަން ނިމެން އުޅެނިކޮށް، ގާތް ތިމާގެ މީހުންނަށް ވިއްސަކަށް ރަށްތައް ބަހާލި މައްސަލަ މި ސަރުކާރުން ބަލަން ފެށުމުން، މިހާރު އަމާޒުކުރަނީ ރާއްޖޭގެ ފަތުރުވެރިކަން ފުނޑާލުމަށް ކަމަށެވެ.

އެގޮތުން އެމްޑީޕީން އިސްވެ އޮވެ ރާއްޖޭގެ ފަތުރުވެރިކަމަށް އަމާޒުކޮށް ޓެރަރިސްޓު ޙަމަލާއެއް ދޭން މަސައްކަތްކުރާ ކަމުގައި މެންބަރު ނިހާދު ރޭ ވިދާޅުވިއެވެ.

ފޭދޫ ދާއިރާގެ ކުރީގެ މެންބަރު މުހައްމަދު ނިހާދު މިރޭގެ ޖަލްސާގައި ވާހަކަފުޅު ދައްކަވަނީ -- ފޮޓޯ: ޕީއެންސީ

އެގޮތުން ނިހާދު ވިދާޅުވީ، އިގްތިސާދު މަރާލައި، ރައްޔިތުން ބަނޑަށް ޖައްސައިގެން ނަމަވެސް އެމްޑީޕީން މަސައްކަތް ކުރަނީ ވެރިކަން ހޯދޭތޯ ކަމަށެވެ. އެގޮތުން އެކަން ނިހާދު ސިފަކުރެއްވީ ގައުމުގެ "ބެރްޑް އެންޑް ބަޓާ"ޔާ ދިމާކުރުމުގެ ގޮތުގައެވެ.

ވިސްނާލައްވާ އަޅުގަނޑުމެންގެ ދިވެހި ރާއްޖެ މާކެޓުކުރަމުން މި ދަނީ ތިން އެސްއެއްގެ މައްޗަށް. އެއީ ސަން، ސޭންޑް އެންޑް ސީ. އޭގެ ބޭރުން ވެސް އެސްތައް ވަރަށް ބައިވަރު. ސޭފްޓީ، ސްޓެބިލިޓީ އެންޑް ސެކިއުރިޓީ އަކީ ވެސް އަޅުގަނޑުމެންގެ މި ޕްރޮޑަކްޓް ވިއްކުމަށްޓަކައި އަޅުގަނޑުމެން ގެންގުޅޭ ޓޫލްސް. މި ފުނޑާލާފައި އަޅުގަނޑުމެންގެ އިގްތިސާދު މަރާލާފައި، ރައްޔިތުން ބަނޑަށް ޖައްސާލައިގެން ވިޔަސް ވެރިކަން ލިބޭތޯ އެ މަސައްކަތްކުރަމުން އެ ދަނީ. ގައުމުގެ ހަޒާނާ ދަވާލަމުން ފުނޑާލަމުން އެ ކޮށާލަމުން މި ދެންނެވި ބީދާއިން އަށް ރުފިޔާއަށް ޕެނަޑޯލް ގުޅައެއް ވިއްކައިގެން މާލިއްޔަތު ހުސްކުރަމުން ދިޔަ ބައެއްގެ އަތްދަށުން އެ ބާރު ދިޔައީމާ އަނެއްކާ ވެސް އެ ބާރު ލިބޭތޯ ގައުމު ހަލަބޮލިކުރަން އެ ކުރާ މަސައްކަތް ނާކާމިޔާބުވީމާ އެ ދިމާކުރަނީ އަޅުގަނޑުމެންގެ ބްރެޑް އެންޑް ބަޓާއާ، - ފޭދޫ ދާއިރާގެ ކުރީ މެންބަރު މުޙައްމަދު ނިހާދު

އެކަމާ ގުޅިގެން ޕީއެންސީން މިއަދު ނެރުނު ބަޔާނެއްގައި ބުނީ، ރާއްޖޭގައި ރަޖިސްޓްރީކޮށްގެން ހިންގާ ސިޔާސީ ޕާޓީއަކުން އަދި މަދަނީ ޖަމިއްޔާއަކުން ދިވެހިރާއްޖޭގެ ފަތުރުވެރިކަމަށް އަދި ޖުމްލަކޮށް ދިވެހި އިގްތިސާދަށް ފޫނުބެއްދޭވަރުގެ ގެއްލުމެއް ލިބިދާނެ ނުރައްކާތެރި ޢަމަލެއް ނުހިންގާނެ ކަމަށެވެ. އަދި ޕާޓީތަކާއި މަދަނީ ޖަމްއިއްޔާތައް ހަރަކާތްތެރިވާނީ ގާނޫނު ހުއްދާކުރާ އިމުގެ ތެރެއިން ކަމަށާއި، އެ އިއުމް ބޭރުވާނަމަ އެކަމާމެދު އަޅަންޖެހޭ ފިޔަވަޅުތައް ދައުލަތުގެ ކަމާބެހޭ އިދާރާތަކުން އަޅާނެ ކަމަާ މެދު ޝައްކު ނުކުރާ ކަމަށެވެ.

އަދި ރާއްޖެއަކީ ރާއްޖެއަށް ޒިޔާރަތްކުރާ ފަތުރުވެރިންނާއި އިންވެސްޓަރުންނަށް ރައްކާތެރިކަން އޮތް، ސުލްޙަވެރި ތަނެއްގެ ގޮތުގައި ދެމެހެއްޓުމަށް ދައުލަތުގެ ކަމާ ގުޅޭ ހުރިހާ އިދާރާތަކުން މަސައަތްކުރާނެ ކަމުގެ ޔަގީންކަން އެބައޮތް ކަމުގައި ވެސް ޕީއެންސީގެ ބަޔާނުގައި ވެއެވެ.

"އަދި ދިވެހިރާއްޖެއަކީ މި ގައުމަށް ޒިޔާރަތްކުރާ ފަތުރުވެރިންނަށް ރައްކާތެރި މަންޒިލެއްގެ ގޮތުގައު ދެމެހެއްޓުމަށް ސަރުކާރުން އަބަދުވެސް މަސައްކަތްކުރަމުންދާނެ ކަމުގެ ޔަގީންކަން އަރުވަމެވެ،" ޕީއެންސީގެ ބަޔާނުގައި ވެއެވެ.

ޕީއެންސީން އެފަދައިން ބަޔާނެއް ނެރެފައިވާއިރު، ނިހާދު ވަނީ ޓޫރިޒަމް މިނިސްޓްރީގެ ސްޓޭޓް މިނިސްޓަރުގެ މަގާމުން މިއަދު ސަސްޕެންޑް ވެސް ކޮށްފައެވެ. ނިހާދު އެ މަގާމުން ސަސްޕެންޑްކުރި ސަބަބެއް އެނިފައި ނުވި ނަމަވެސް، އެކަން "މެންދުރު ޓީވީ"އަށް ވަނީ ކަށަވަރުކުރެވިފައެވެ.