އެމްޑީޕީގެ ވެރިކަން ނިމެން އުޅެނިކޮށް، ގާތް ތިމާގެ މީހުންނަށް ވިއްސަކަށް ރަށްތައް ބަހާލި މައްސަލަ މި ސަރުކާރުން ބަލަން ފެށުމުން، މިހާރު އަމާޒުކުރަނީ ރާއްޖޭގެ ފަތުރުވެރިކަން ފުނޑާލުމަށް ކަމުގައި ފޭދޫ ދާއިރާގެ ކުރީ މެންބަރު މުޙައްމަދު ނިހާދު ވިދާޅުވެއްޖެއެވެ.

ޕީއެންސީގެ ޖަގަހަ ޖަލްސާގައި ވާހަަކަފުޅު ދައްކަވަމުން، އެމްޑީޕީގެ ވެރިކަމުގައި ހިންގި ވައްކަންތަކުގެ ވާހަކަ ފާހަގަކުރައްވަމުން މެންބަރު ނިހާދު ވިދާޅުވީ، ސެޕްޓެމްބަރު 30 ގައި އެމްޑީޕީގެ ވެރިކަން ނިމެން ކައިރިވެފައި ވަނިކޮށް، އޭރު އެމްޑީޕީގެ އިސް ސަފުގައި ތިއްބެވި ބޭފުޅުން ވަނީ "ބަފާބޭ"މެންނާއި އާއިލާގެ މީހުންނަށް ވިއްސަކަށް ރަށް ބަހާލައިފައި ކަމަށެވެ.

އަދި އެ މައްސަލަތައް މިއަދު ބަލާތީވެ މި ގައުމު ހަލަބޮލިކޮށް، މި ގައުމުގައި ހިންގާ ރިސޯޓުތައް ހުއްޓުވައި، މި ގައުމުގެ އިގްތިސާދު ފުނޑާލުމަށް އެމްޑީޕީން މިހާރު ނުކުންނަން ތައްޔާރަށް ތިބި ކަމަށާއި، އެކަމުގެ ތެރެއިން އެއް ފަޅެއްގައި އޮތް ތިން ރިސޯޓަކަށް އަރައި އަޑުގަދަ ކުރުމަށް އެމްޑީޕީން މަސައްކަތް ކުރަމުންދާ ކަމުގައި މެންބަރު ނިހާދު ވިދާޅުވިއެވެ.

ޕީއެންސީގެ މިރޭގެ ޖަގަހަ ޖަލްސާގެ ތެރެއިން -- ފޮޓޯ: ޕީއެންސީ

ނިހާދު ވިދާޅުވީ، އިގްތިސާދު މަރާލައި، ރައްޔިތުން ބަނޑަށް ޖައްސައިގެން ނަމަވެސް އެމްޑީޕީން މަސައްކަތް ކުރަނީ ވެރިކަން ހޯދޭތޯ ކަމަށެވެ. އެގޮތުން ގައުމު ހަލަބޮލިކުރުމަށް އެމްޑީޕީން ކުރާ މަސައްކަތް ނާކާމިޔާބުވުމުން، މިއަދު އެމްޑީޕީގެ އަމާޒަކީ ރާއްޖޭގެ އާމްދަނީ ވަންނަ މައިގަނޑު ދޮރުކަމުގައިވާ ފަތުރުވެރިކަން ފުނޑާލުމަށް އަމާޒު ހިފުން ކަމުގައި ނިހާދު ފާހަގަކުރެއްވިއެވެ. އެގޮތުން އެކަން ނިހާދު ސިފަކުރެއްވީ ގައުމުގެ "ބެރްޑް އެންޑް ބަޓާ"ޔާ ދިމާކުރުމުގެ ގޮތުގައެވެ.

ވިސްނާލައްވާ އަޅުގަނޑުމެންގެ ދިވެހި ރާއްޖެ މާކެޓުކުރަމުން މި ދަނީ ތިން އެސްއެއްގެ މައްޗަށް. އެއީ ސަން، ސޭންޑް އެންޑް ސީ. އޭގެ ބޭރުން ވެސް އެސްތައް ވަރަށް ބައިވަރު. ސޭފްޓީ، ސްޓެބިލިޓީ އެންޑް ސެކިއުރިޓީ އަކީ ވެސް އަޅުގަނޑުމެންގެ މި ޕްރޮޑަކްޓް ވިއްކުމަށްޓަކައި އަޅުގަނޑުމެން ގެންގުޅޭ ޓޫލްސް. މި ފުނޑާލާފައި އަޅުގަނޑުމެންގެ އިގްތިސާދު މަރާލާފައި، ރައްޔިތުން ބަނޑަށް ޖައްސާލައިގެން ވިޔަސް ވެރިކަން ލިބޭތޯ އެ މަސައްކަތްކުރަމުން އެ ދަނީ. ގައުމުގެ ހަޒާނާ ދަވާލަމުން ފުނޑާލަމުން އެ ކޮށާލަމުން މި ދެންނެވި ބީދާއިން އަށް ރުފިޔާއަށް ޕެނަޑޯލް ގުޅައެއް ވިއްކައިގެން މާލިއްޔަތު ހުސްކުރަމުން ދިޔަ ބައެއްގެ އަތްދަށުން އެ ބާރު ދިޔައީމާ އަނެއްކާ ވެސް އެ ބާރު ލިބޭތޯ ގައުމު ހަލަބޮލިކުރަން އެ ކުރާ މަސައްކަތް ނާކާމިޔާބުވީމާ އެ ދިމާކުރަނީ އަޅުގަނޑުމެންގެ ބްރެޑް އެންޑް ބަޓާއާ، - ފޭދޫ ދާއިރާގެ ކުރީ މެންބަރު މުޙައްމަދު ނިހާދު

ކުރީގެ އެމްޑީޕީގެ މެންބަރު ނިހާދު ވިދާޅުވީ، އެކަން ވިޔަ ދީގެން ނުވާނެެ ކަމަށާއި، އެކަމާ ދެކޮޅަށް ރައްޔިތުންނާއި ސަރުކާރު އެކީގައި ނުކުންނަން ޖެހޭ ކަމަށެވެ. އަދި ރާއްޖޭގެ ފަތުރުވެރިކަމުގެ ސިނާއަތުގައި ހަރަކާތްތެރިވާ އެއްވެސް ފަރާތަކުން އެކަމުގައި ބައިވެރި ނުވުމަށް ވެސް މެންބަރު ވަނީ އެދިވަޑައިގަންނަވައިފައެވެ.