ކުދިންގެ ޒާތީ މައުލޫމާތު ސީދާ ގޮތުންނާއި ނުސީދާގޮތުން ނަމަވެސް އެއްވެސް މީޑިއާއަކުން އާންމުކޮށްފިނަމަ ފިޔަވަޅު އަޅާނެކަމަށް ޗިލްޑްރަންސް އޮމްބަޑްސްޕާސަންގެ އޮފީހުން ބުނެފިއެވެ.

އެ އޮފީހުން ނެރުނު ބަޔާނެއްގައި ބުނެފައިވަނީ ކުޑަކުދިންގެ ހައްގުތައް ރައްކާތެރިކުރުމުގެ ގާނޫނުގައި ބަޔާންކޮށްފައިވާ މިންވަރާ ހިލާފަށް ރާއްޖޭގައި ރަޖިސްޓްރީކޮށްގެން ހިންގާ މީޑިއާތަކާ އަދި އެ ނޫންވެސް އެހެން މީޑިއާގެ ވަސީލަތްތައް ނުވަތަ މަންސަތަކުގައި ކުޑަކުދިންގެ ކަރާމަތަށް އުނިކަން އަންނަފަދަ މައުލޫމާތު އާންމުކުރަމުންދާކަން ފާހަގަވެފައިވާ ކަމަށެވެ.

ކުޑަކުދިންގެ ހައްގުތައް ރައްކާތެރިކުރުމުގެ ގާނޫނުގެ 33 ވަނަ މާއްދާގައި ކުޑަކުދިންގެ ކަރާމާތަށް އުނިކަން އަންނަ ގޮތަކަށް ކުޑަކުދިންގެ ޒާތީ މައުލޫމާތު އެއްވެސް ފަރާތަކުން އާންމުކޮށްގެން ނުވާނެ ކަމަށް ބަޔާންކޮށްފައިވާކަމަށާއި އެގޮތަށް ބަޔާންކޮށްފައިވާއިރު ބައެއް މީޑިއާގެ ވަސީލަތްތަކުގައި ކުޑަކުދިންގެ މައުލޫމާތު އާންމުކުރަމުންދާކަން ފާހަގަކުރެވިފައިވާކަމަށް އެ އޮފީހުން ބުނެފައިވެއެވެ. އެފަދަ ކަންކަމަކީ ކުއްޖާގެ ކަރާމަތާއި ރައްކާތެރިކަމަށް އުނިކަމެއް އަތުވެދާނެފަދަ ކަމެއްކަމާއި އެގޮތަށް މައުލޫމާތު އާންމުކުރުމަކީ އެކަމުގެ ސަބަބުން ކުދިންގެ މަސްލަހަތު ރައްކާތެރިނުކުރެވި ކުއްޖާ އަނިޔާއަކަށް އަދި ނުރައްކަލަކަށް ނުވަތަ ގޯނާއަކަށް ހުށަހެޅިދާނެ ކަމެއްކަމަށްވެސް އޮފީހުން ހާމަކުރެއެވެ.

ވުމާއެކު ކުދިންގެ ޒާތީ މައުލޫމާތު ސީދާ ގޮތުންނާއި ނުސީދާގޮތުން ނަމަވެސް އެއްވެސް މީޑިއާއަކުން އާންމުކޮށްފިކަން އެ އޮފީހުގެ ސަމާލުކަމަށް އަތުވެއްޖެނަމަ އުސޫލުގެ ތެރެއިން ފިޔަވަޅު އަޅާނެކަމަށް އެ އޮފީހުން މައުލޫމާތުދެއެވެ.