އަލީ ޝަމާލް އަބްދުﷲ (ޝަންމު) ގެ މޮޅުކުޅުމާއެކު ފުވައްމުލަކުން މުބާރާތުގެ ހުރިހާ މެޗަކުން މޮޅުވުމުގެ ރެކޯޑް ދަމަހަށްޓައި މުބާރާތުގެ ދެވަނަބުރުގެ ޖާގަ ކަށަވަރުކޮށްފިއެވެ. ގްރޫޕް އޭގައި ދ. މީދޫއާއިދެކޮޅަށް ކުޅުނު މި މެޗު ފުވައްމުލަކުން ކާމިޔާބުކުރީ 4-0 އިންނެވެ. މި މެޗުގައި ޝައްމު ވަނީ ހެޓްރިކްހަދާފައެވެ. އަދި ރޭގެ ލަނޑާއެކު މި މުބާރާތުގައި މިހާތަނަށްޖެހި 6 ގޯލާއެކު ގޯލުޗާޓުގެ އެއްވަނައިގައި އޮތީ ޝައްމުއެވެ.

މެޗުގެ ފުރަތަމަގޯލަކީ ޝައްމުގެ ހިތްގައިމު ހިލޭޖެހުމަކުން ޖެހި ގޯލެކެވެ. އަދި ފުވައްމުލަކުގެ ދެވަނަ ގޯލުޖެހީވެސް އޭނާއެވެ. މި މެޗުގެ ފުވައްމުލަކުގެ ތިންވަނަ ގޯލަކީ މެޗުގެ 86 ވަނަމިނެޓުގައި ޝަމާލްގެ އެސިސްޓަކުން ފުވައްމުލަކުގެ ކެޕްޓަން އަޙްމަދު އިމާދު ޖަހައިދިން ގޯލެކެވެ. އަދި މެޗުގައި ހެޓްރިކް ހަމަކުރި ގޯލަކީ މެޗުގެ އިތުރުވަޤުތުގައި ފުވައްމުލަކަށް ލިބުނު ޕެނަލްޓީއަކުން ޝަމާލް ޖެހިގޯލެކެވެ.

ރޭގެ މޮޅާއެކު ލިބުނު 9 ޕޮއިންޓާއެކު ފުވައްމުލަކު އޮތީ ގްރޫޕް އޭގެ ތާވަލުގެ އެއްވަނައިގައެވެ. މި ގްރޫޕްގެ ދެވަނައިގައި ކުޑަހުވަދޫ އޮތްއިރު، ފުލުގައިއޮތީ ފަރެސްމާތޮޑާއެވެ. މި ގްރޫޕްގައި ކުޑަހުވަދޫއާއި ދިއްދޫ ބައްދަލުކުރާމެޗު މިއަދުހަވީރު ކުޅެވޭނެއެވެ.