ގޯލްޑަން ފުޓްބޯޅަ މުބާރާތުގައި މާފުއްޓާއި ކެންދޫ ބައްދަލުކުރިމެޗުން އެއްވަރުވެ ދެޓީމަށްވެސް ދެވަނަބުރުން ޖާގަހޯދުމުގެ އަމިއްލަބާރު ގެއްލިއްޖެއެވެ. ގަލޮޅުދަނޑުގައި ކުޅެވުނި މިމެޗުގެ ފުރިހަމަވަޤުތު ހަމަވީ 1-1 އިން އެއްވަރުވެގެންނެވެ.

ރޭގެމެޗަށް ދެ ޓީމުން ނިކުތްއިރު މިދެޓީމު މިމުބާރާތުގައި ކުޅުނު ފުރަތަމަ މެޗުން ވަނީ ބަލިވެފައެވެ. އެހެންކަމުން މިދެޓީމު މިމެޗަށް ނިކުތީ މޮޅުވާން މަޖުބޫރު މެޗެއްގެގޮތުގައެވެ. މީގެކުރިން ކެންދޫވަނީ އަލިފުށި އަތުން 1-5 އިން ބަލިވެފައެވެ. އަދި ނައިފަރުވެސް ބަލިވެފައިވަނީ އަލިފުށި އަތުންނެވެ. މި މެޗުން އެޓީމު ބަލިވެފައިވަނީ 2-0 އިންނެވެ.

މެޗުފަށައިގެން ބޮޑުބައެއް ކޮންޓްރޯލްކޮށްގެން ކުޅުނީ ކެންދޫއިންނެވެ. އައި މެޗުގެ ފުރަތަމަ ގޯލުޖަހާ ލީޑުހޯދީވެސް ކެންދޫއިންނެވެ. މި ގޯލު ކާމިޔާބުކޮށްދިނީ ކެންދޫއަށް ލިބުނު ކޯނަރަކުން ގާސިމް ޝަމާމް (ޝަންމެ) އެވެ. ގާސިމް ޝަމާމް އަކީ ފުރަތަމަ ޑިވިޝަނުގެ ދަ ގްރާންޑޭއަށް ކުޅެފައިވާ ކުޅުންތެރިއެކެވެ.

ނަމަވެސް މެޗުގެ 88 ވަނަ މިނެޓުގައި ކެންދޫގެ ޑިފެންޑަރު ކުރި ފައުލަކާއިގުޅިގެން ލިބުނު ޕެނަލްޓީއަކުން ނަތީޖާ ހަމަކޮށްދިނީ ދެވަނަހާފުގައި ކުޅެންނިކުތް އަލީ އުޒައިރުއެވެ.

މި މެޗުން އެއްވަރުވުމާއެކު މި މުބާރާތުގައި މި ދެޓީމަށް ލިބިފައިވަނީ އެންމެޕޮއިންޓެކެވެ. އަދި މި ގްރޫޕްގައި މި ދެޓީމަށް ދެން އޮތީ އެންމެމެޗެކެވެ. އެހެންކަމުން ދެވަނަ ބުރަށް ދިޔުމުގެ އަމިއްލަބާރު ދެޓީމަށްވެސްވަނީ ގެއްލިފައެވެ.