ސިހުރު ހަދާ ކަމަށް ތުހުމަތު ކުރެވިގެން ހއ ކެލައިން ފަސް މީހަކު ހައްޔަރުކޮށްފި އެވެ.

ފުލުހުން ހއ ކެލައަށް ގޮސް ބަޔަކު ހައްޔަރު ކޮށްފައިވަނީ އެރަށުގައި ސިހުރު ހަދާ ކަމަށް ބުނެ އެރަށުގެ އާންމުން ތަކެއް ކުރި ޝަކުވާ އަކާއި ގުޅިގެންނެވެ. ފުލުހުން ވަނީ އެރަށުން 5 މީހަކު ހައްޔަރު ކޮށް އެމީހުން ދިރިއުޅޭ ގެ ބަލާ ފާސް ކޮށްފަ އެވެ.

އެހެން ނަމަވެސް އެކަމުގެ ތަފްސީލެއް ފުލުހުން ނުދެ އެވެ.

މި ޝަކުވާތައް އިތުރުވީ ރަށުގައި ބަލި ފެތުރި ގިނަ ބައެއްގެ ހާލު ދެރަވުމާ ގުޅިގެން ކަމަށްވެ އެވެ.

ފުލުހުންގެ މީޑިއާ އޮފިސަރު ވިދާޅުވީ ކެލާއިން ލިބިފައިވާ ޝަކުވާ އަކާއި ގުޅިގެން ފުލުހުން އެރަށަށް އަރާ ފަސް މީހުން ހައްޔަރު ކޮށްފައިވާ ކަމަށެވެ. އަދި އެ ފަސް މީހުން މިހާރު ދޫކޮށްލާފައިވާ ކަމަށް އޮފިސަރު ވިދާޅުވި އެވެ.މިކަމާ ގުޅިގެން އިތުރަށް ބަލަން ޖެހޭ ކަންކަން ބަލަމުންދާ ކަމަށްވެސް އޮފިސަރު ވިދާޅުވި އެވެ.

މީޑިއާ އޮފިސަރު ވިދާޅުވީ ފުލުހުންނަށް ލިބިފައިވާ ޝަކުވާއަކާއި ގުޅިގެން އެރަށުގެ 9 ތަނެއް ބަލައިފާސްކޮށްފައިވާ ކަމަށެވެ.