ހއ. ދިއްދޫ ޓީމުން އިއްޔެ ކުޅުނު 90 ޕްލަސް ގޯލްޑް ކަޕްގެ މެޗުގައި ދ. ކުޑަހުވަދޫ 6-2 އިން ބަލިކޮށް މުބާރާތުގައި ކުރިޔަށް ދިޔުމަށް މުހިންމު މޮޅެއް ހޯދައިފިއެވެ. މި މޮޅާއެކު ދިއްދޫ ވަނީ ގްރޫޕް އޭ ގެ ދެވަނަ ހޯދާފައެވެ.މި މެޗުގެ ކުރިން ދިއްދޫއަށް މުބާރާތުގައި ޕޮއިންޓެއް ލިބިފައި ނުވާއިރު، މި މޮޅާއެކު ދިއްދޫއަށް ވަނީ 3 ޕޮއިންޓް ލިބި ޕޮއިންޓް ތާވަލުގެ 2 ވަނައަށް ޖެހިލާފައެވެ މިހާރު ގްރޫޕްގެ އެއްވަނައިގައި އޮތީ ކުޅުނު ހުރިހާ މެޗަކުން މޮޅުވެގެން ފުވައްމުލަކެވެ. ދެވަނައިގައި އޮތް ދިއްދޫ އާއި ތިންވަނައިގައި އޮތް މީދޫ އަދި ކުޑަހުވަދޫ އަށްވެސް ލިބިފައިވަނީ 3 ޕޮއިންޓެވެ. އެހެންކަމުން މި ގްރޫޕްގެ 2، 3 އަދި 4 ވަނަ ކަނޑައަޅާފައިވަނީ ފައިދާ ގޯލަށް ބަލައިގެންނެވެ. އެގޮތުން ދިއްދޫގެ ފައިދާ ގޯލު 0 ގައި އޮތްއިރު، މީދޫ އޮތީ ފައިދާ ގޯލު 1- ގައެވެ. އަދި ކުޑަހުވަދޫ އޮތީ 3- ގައެވެ.މި މެޗުގެ ޚާއްޞަ ފާހަގަކޮށްލެވޭ ކުޅުންތެރިޔަކީ ރާއްޖޭގެ 19 އަހަރުން ދަށުގެ ޤައުމީ ޓީމުގެ ކުޅުންތެރިޔާ އަހްޒަމްއެވެ. އޭނާ ވަނީ ދިއްދޫއަށް ހެޓްރިކެއް ހަދާދީފައެވެ. އަހްޒަމް ދަނޑަށް ނިކުތީ ދެވަނަ ހާފުގައި ކަމަށްވާއިރު، އޭނާ ދަނޑަށް ނިކުތްތާ މިނެޓެއްފަހުން ވަނީ ފުރަތަމަ ގޯލު ޖަހާފައެވެ.ކުޑަހުވަދޫގެ ދެ ލަނޑު ޖަހައިދީފައިވަނީ މުޙައްމަދު ޒިހާން އާއި ހާރޫން އިބްރާހިމްއެވެ.