އިނގިރޭސި ޕްރީމިއަރ ލީގު ޖެހިޖެހިގެން 4 ފަހަރު ކާމިޔާބުކޮށްފައިވާ މެންޗެސްޓަރ ސިޓީ ލީގުގައި ޖެހިޖެހިގެން ހަތަރުވަނަ ފަހަރަށް ބަލިވެއްޖެއެވެ. ރޭގައި މެންޗެސްޓަރ ސިޓީ ބަލިވީ ލިވަރޕޫލާއި ވާދަކޮށެވެ. މި މެޗު ލިވަރޕޫލުން ކާމިޔާބުކުރީ 2-0 އިންނެވެ.

ލިވަރޕޫލްގެ އަމިއްލަ ދަނޑުގައި ކުޅެވުނު މި މެޗުގައި ފުރަތަމަ ހާފުގެ ބޮޑުބައެއް ކޮންޓްރޯލްކޮށްގެން ކުޅުނީ ލިވަރޕޫލުނެވެ. އެގޮތުން މެޗުފެށިގެން 12 ވަނަ މިނެޓުގައި ސަލާޙް ދިން ބޯޅައަކުން ކޯޑީ ގަކްޕޯ ފަނީ މެޗުގެ މުރަތަމަ ގޯލުޖަހާފައެވެ. އަދި މި ގޯލުގެ އިތުރުންވެސް ފުރަތަމަ ހާފުގައި ލިވަރޕޫލުން ވަނީ ނުރައްކާތެރި ގިނަ ހަމަލާތަކެއް ސިތީގެ ގޯލަށް ފޮނުވާލަފައެވެ. އަދި އޭގެ ތެރެއިން ދެ ފުރުސަތެއްގައި ބޯޅަ ގޯލުގެ ދަނޑީގައި ޖެހިފައި ބޭރަށްގޮސްފައިވެއެވެ.

މެޗުގެ ދެވަނަގޯލަކީ ސިޓީގެ ގޯލްކީޕަރު ޑިއާޒް އަށް ކުރިފައުލަކާއި ގުޅިގެން ލިބުނު ޕެނަލްޓީއަކުން ސަލާޙް ޖެހި ގޯލެކެވެ. މި ސީޒަނުގައި މޮޅުކުޅުމެއް ދައްކަމުން އަންނަ ސަލާޙު ވަނީ ރޭގެ ގޯލާއެކު މިހާތަނަށް މި ސީޒަނުގައި 13 ގޯލާއެކު 11 އެސިސްޓް ހަދާދީފައެވެ.

ރޭގެ ބައްޔާއެކު ސިޓީ އެންމެ ފަހުން ކުޅުނު 7 މެޗުގެ ތެރެއިން އެއް މެޗުން އެއްވަރުވެ އަނެއް 6 މެޗުން ވަނީ ބަލިވެފައެވެ. މިއީ ގާޑިއޯލާގެ ކެރިއަރުގައި މިހާތަނަށް ހޯދި އެންމެ ދަށް ނަތީޖާތަކެވެ. މިއާއެކު ލިވަރޕޫލުގެ ސަޕޯޓަރުން ވަނީ ގާޑިއޯލާ އަށް ނިސްބަތްކޮށް އޭނާ މާދަމާ ހެނދުނު ކޯޗުކަމުން ވަކިކުރާނެކަމަށް ބުނެ ގާޑިއޯލާއާއި ދިމާކުރުމަށް ލަވަކިޔާފައެވެ. އެހެންނަމަވެސް ގާޑިއޯލާ ވަނީ އޭނާއަކީ 6 ޕްރީމިއަރ ލީގު ކާމިޔާބުކޮށްފައިވާ ކޯޗެއްކަން އެގަޑީގައި ލިވަރޕޫލުގެ ސަޕޯޓަރުންނަށް ހަނދާންކޮށްދީފައެވެ.