އިނިގރޭސި ޕްރިމިއާ ލީގުގައި ނޮޓެންހަމް ފޮރެސްޓްގެ އަތުން ގަދަބާރު، ލިވާޕޫލް ބަލިވެއްޖެއެވެ.

އަމިއްލަ ދަނޑު، އެންފީލްޑްގައި ލިވާޕޫލްއިން ރޭ ކުޅުނު އެ އެ މެޗުން ލިބުނު މޮޅަކީ، ފާއިތުވި 55 އަހަރުގެ ތެރޭގައި އެންފީލްޑުގައި ނޮޓިންހަމްއަށް ލިބުނު ފުރަތަމަ މޮޅެވެ.

މުޅި މެޗުގައި ވެސް ބޯޅަ ހިފަހައްޓައި، ރަނގަޅު ކުޅުމެއް ކުޅުނީ ލިވަޕޫލްއިންނެވެ. އެހެން ނަމަވެސް ލިބުނު ފުރުސަތުތަކުގެ ބޭނުން ނުހިފި، މެޗު ނޮޓިންހަމްގެ ކޮޅަށް އެނބުރުނީއެވެ.

އެގޮތުން މުޅި މެޗުގައި ވެސް ޖެހި ހަމައެކަނި ގޯލު، ނޮޓެންހަމްއަށް ޖަހައިދިނީ މި ސީޒަނުގައި ޗެލްސީން އެ ޓީމަށް ބަދަލުވި، އިނގިރޭސި ފޯވާޑް ކެލަމް ހަޑްސަން އޮޑޮއިއޭވެ. އޭނާ އެ ގޯލު ޖެހީ ކައުންޓާ އެޓޭކްއެއްގައި، ލިބުނު ފުރުސަތެއްގެ ބޭނުން ހިފައިގެން މެޗުގެ 72 ވަނަ މިނެޓުގައެވެ.

ލިވާޕޫލް ކޮޅަށް ގޯލު ޖަހަނީ -- ފޮޓޯ/ ލިވާޕޫލް

މެޗުގެ މުޅި ކޮންޓްރޯލް ނަގައިގެން ލިވާޕޫލުން ކުޅުނު ނަމަވެސް، މުޅި މެޗުގައި ވެސް ލިވާޕޫލުގެ ނިންމުންތަައް ފެނުނީ ދޯހަޅިކޮށެވެ. އޭގެ ހެއްކަކީ، ލިވާޕޫލުން އެ މެޗުގައި 14 ޝޮޓު ޖެހިއިރު، އޭގެ ތެރެއިން ގޯލާ އަމާޒުވީ އެންމެ ފަސް ޝޮޓެވެ. އެއާ ޚިލާފަށް ނޮޓެންހަމް އިން ޖެހި ފަސް ޝޮޓުގެ ތެރެއިން ތިން ޝޮޓު ގޯލާ އަމާޒުކުރިއެވެ.

ލިވާޕޫލުގެ ބައްޔާއެކު، އެ ޓީމު ވަނީ ލީގުގެ ދެވަނައަށް ވެއްޓިފައެވެ. އެއްވަނައިގައި އޮތީ ކުޅުނު ހަތަރު މެޗުން ވެސް މޮޅުވެ، 12 ޕޮއިންޓާއެކު އޮތް މެންޗެސްޓާ ސިޓީއެވެ.