އިނގިރޭސި ޕްރިމިއާ ލީގުގައި ރޭ ކުޅުނު ފޯރިގަދަ މެޗުގައި ކެޕްޓަން މާޓިން އޮޑެގާޑު ކާމިޔާބުކުރި ލަނޑާއެކު 2-1 ގެ ނަތީޖާއަކުން ވޯލްޑް ޗެންޕިއަން ޗެލްސީ ބަލިކޮށް، އެންމެ ފަހުގެ ޗެމްޕިއަން އާސެނަލުން ސީޒަނުގެ ފުރިހަމަ ރެކޯޑު ދަމަހައްޓައިފިއެވެ. މި ނަތީޖާއާއެކު ޒަބީ އަލޮންސޯގެ އިރުޝާދުގެ ދަށުން ޗެލްސީން ސީޒަން ފެށި ފުރިހަމަ ރެކޯޑަށް ވަނީ ނިމުމެއް އައިސްފައެވެ.

އެމިރޭޓްސް ސްޓޭޑިއަމްގައި ކުޅުނު މި މެޗު ފެށިގެން 77 ވަނަ ސިކުންތުގައި މޯގަން ރޮޖާސް ވަނީ ލަނޑެއް ޖަހައި ޗެލްސީއަށް ކުރިހޯދައިދީފައެވެ. މިއީ މި ސީޒަނުގެ ފުރަތަމަ ތިން މެޗުގެ ވެސް ފުރަތަމަ ފަސް މިނެޓުގެ ތެރޭގައި ލަނޑު ޖެހި ޕްރިމިއާ ލީގުގެ ފުރަތަމަ ޓީމުގެ ޝަރަފު ޗެލްސީއަށް ލިބުނު ލަނޑެވެ. ނަމަވެސް، މެޗުގެ 25 ވަނަ މިނެޓުގައި ޗެލްސީގެ ކުރީގެ ފޯވާޑް ކައި ހަވާޓްޒް ވަނީ މޮޅު ފިނިޝިންއަކުން އާސެނަލަށް ނަތީޖާ ހަމަހަމަކޮށްދީފައެވެ.

Ad by Hajj Corporation

ދެވަނަ ހާފު ފެށިގެން ފަސްވަނަ މިނެޓުގައި އާސެނަލުން ވަނީ ލީޑު ނަގާފައެވެ. ކްރިސްޓޯސް ޓްޒޮލިސް ތަނަވަސްކޮށްދިން ފުރުސަތަކުން މި ލަނޑު ޖަހައިދިނީ ކެޕްޓަން އޮޑެގާޑެވެ. މި އެސިސްޓާއެކު ޓްޒޮލިސް ވެފައިވަނީ ވޭތުވެދިޔަ ސީޒަނުން ފެށިގެން ޔޫރަޕްގެ ގަދަ 10 ލީގުގައި އެންމެ ގިނަ އެސިސްޓް (24) ހެދި ކުޅުންތެރިޔާއަށެވެ.

މެޗުގެ ފަހު ވަގުތުކޮޅުގައި ނަތީޖާ ހަމަހަމަކުރަން ޗެލްސީގެ އެސްޓެވާވޯ ފޮނުވާލި ނުރައްކާތެރި ހަމަލާ އާސެނަލްގެ ގޯލްކީޕަރު ޑޭވިޑް ރާޔާ ވަނީ ހުށިޔާރުކަމާއެކު ދިފާއުކޮށްފައެވެ. މި މޮޅާއެކު މި ސީޒަނުގެ ލީގުގައި ސައްތައިން ސައްތަ ރެކޯޑެއް އޮތީ އާސެނަލް އަދި މެންޗެސްޓާ ސިޓީގެ އެކަންޏެވެ.