އިނގިރޭސި ޕްރިމިއަރ ލީގުގައި ނޮޓިންގހަމް ފޮރެސްޓުގެ ދަނޑުގައި ކުޅުނު މެޗު، ބަދަލު ކުޅުންތެރިއެއްގެ ގޮތުގައި ނުކުތް ނޯނީ މަޑުއޭކޭ ޖެހި ލަނޑުން 1-0 އިން އާސެނަލް ކާމިޔާބުކޮށްފިއެވެ.

މެޗުގެ ފުރަތަމަ ހާފުގައި ދެ ޓީމުގެ ފަރާތުންވެސް އާދައިގެ ކުޅުމެއް ފެނިގެންދިޔައިރު، މެޗުގެ ހަމައެކަނި ލަނޑު ފެނިގެންދިޔައީ 80 ވަނަ މިނެޓުގައެވެ. މިއީ މަޑުއޭކޭ ފޮނުވާލި ހަމަލާއެއް ޖައިރް ކުންހާގެ ގައިގައި ޖެހި މިސްރާބު ބަދަލުވެގެން ގޯލުގެ ތެރެއަށް ވަން ލަނޑެކެވެ. މިއާއެކު މަޑުއޭކޭ ޕްރިމިއަރ ލީގުގައި ޖެހި 17 ލަނޑުގެ ތެރެއިން 13 ލަނޑު ކާމިޔާބުކޮށްފައިވަނީ ރަށުން ބޭރުގައެވެ.

Ad by Hajj Corporation

މެޗުގެ ފަހުވަގުތުކޮޅު ފޮރެސްޓުން ނަތީޖާ ހަމަހަމަކުރުމަށް މަސައްކަތްކުރި ނަމަވެސް، އާސެނަލްގެ ޑިފެންސުން ވަނީ އެ ހަމަލާތައް ދިފާއުކޮށްފައެވެ. މި ނާކާމިޔާބީއާއެކު ފޮރެސްޓް ލީގު ތާވަލުގެ ރެލިގޭޝަން ޒޯނުގައި އޮތްއިރު، މިއީ 2019 ވަނަ އަހަރު މިކޭލް އާޓެޓާ އާސެނަލްގެ ކޯޗުކަމާ ހަވާލުވި ފަހުން އެ ޓީމު 1-0 އިން މޮޅުވި 32 ވަނަ މެޗެވެ.