ޕްރިމިއާ ލީގުގެ އެންމެ ފަހުގެ ޗެމްޕިއަން އާސެނަލް މި ސީޒަނުގައި ދަމަހައްޓަމުން އައި ފުރިހަމަ ރެކޯޑަށް ނިމުމެއް ގެނެސް، ބްރައިޓަން އެންޑް ހޯވް އެލްބިއަން ނުވަތަ ސީގަލްސް އިން 3-0 ގެ ތަފާތު ބޮޑު ނަތީޖާއަކުން އާސެނަލް ބަލިކޮށްފިއެވެ. އެމެރިކަން އެކްސްޕްރެސް ސްޓޭޑިއަމްގައި ކުޅުނު މި މެޗުން ހޯދި މޮޅާއެކު، ފަބިއަން ހުރްޒެލާގެ އިރުޝާދުގެ ދަށުން ކުޅޭ ބްރައިޓަން ވަނީ ތާވަލުގެ ތިންވަނައަށް ޖެހިލާފައެވެ.

ބްރައިޓަންގެ ކްލަބަށް 125 އަހަރު ފުރުން ފާހަގަކުރުމުގެ ގޮތުން ޚާއްސަ ޖާޒީއެއްގައި ކުޅުނު މި މެޗުގައި، އެ ޓީމަށް ލީޑު ނަގައިދިނީ 31 ވަނަ މިނެޓުގައި ޕަސްކަލް ގްރޮސް އެވެ. އޭރިއާގެ ބޭރުން އޭނާ ފޮނުވާލި ބާރު ހަމަލާ ގޯލަށް ވަނީ އަރިމަތީ ދަނޑީގައި ޖެހިފައެވެ. އަދި ފުރަތަމަ ހާފު ނިމެން ދަނިކޮށް، 45 ވަނަ މިނެޓުގައި ޗަރަލަމްޕޮސް ކޮސްޓޫލާސް ވަނީ 25 ޔާޑު ދުރުން ގޯލުގެ ތިރީ ކަނަށް ބޯޅަ ވައްދާލައި ބްރައިޓަންގެ ލީޑު ފުޅާކޮށްދީފައެވެ.

Ad by Hajj Corporation

ދެވަނަ ހާފުގައި ވެސް މެކަލް އާޓެޓާގެ އާސެނަލަށް އެދެވޭ ކުޅުމެއް ނުދެއްކުނު އިރު، ބްރައިޓަންގެ ތިންވަނަ ލަނޑު މެޗުގެ 60 ވަނަ މިނެޓާ ގާތްވެފައި ވަނިކޮށް ކާމިޔާބުކުރީ ޕްރިމިއާ ލީގުގައި އަލަށް ފުރަތަމަ އެގާރައިގައި ހިމެނިގެން ކުޅުނު ޗެމާ އެންޑްރެސް އެވެ. މިއީ ގްރޮސް ނަގައިދިން ކޯނަރަކުން އޭނާ ބޮލުން ޖަހައި ކާމިޔާބުކުރި ލަނޑެކެވެ.

މި މެޗުގައި ބްރައިޓަންއަށް ލަނޑު ޖަހާނެ އިތުރު ފުރުސަތުތައް ވެސް ލިބުނު އިރު، ޕަސްކަލް ސްޓްރުއިކް، މެޓް އޯރައިލީ އަދި މަލިކް ޔަލްކޫޔޭ އަށް ވަނީ ލަނޑު ޖެހުމާ ވަރަށް ގާތަށް ގޮސްފައެވެ. އަނެއްކޮޅުން އާސެނަލަށް ލިބުނު މަދު ފުރުސަތުތަކުގެ ތެރެއިން ކައި ހަވާޓްޒް ފޮނުވާލި ހަމަލާ ދިޔައީ ބޭކާރުވެގެންނެވެ.

މިއީ ވިދިވިދިގެން ޕްރިމިއާ ލީގުގެ އެންމެ ފަހުގެ ޗެމްޕިއަނުން އަމިއްލަ ދަނޑުގައި ބްރައިޓަން އަތުން ބަލިވި ތިންވަނަ ސީޒަނެވެ. މީގެ ކުރިން 2024-25 ގައި މެންޗެސްޓާ ސިޓީ އަދި 2025-26 ގައި ލިވަޕޫލް ވެސް ވަނީ މި ދަނޑުގައި ބަލިވެފައެވެ. މީގެއިތުރުން، އާސެނަލް ކޮޅަށް ލީގުގައި އެންމެ ފަހުން ވަން 18 ލަނޑުގެ ތެރެއިން 7 ލަނޑަކީ އޭރިއާ ބޭރުން ޖަހާފައިވާ ލަނޑުތަކެވެ.