އީއެފްއެލް ކަޕުގެ ނުވަތަ އިނގިރޭސި ލީގު ކަޕްގެ ތިންވަނަ ބުރުގައި އިޕްސްވިޗް ޓައުންއާ ދެކޮޅަށް ކުޅުނު މެޗު 4-2 ގެ ނަތީޖާއަކުން ކާމިޔާބުކޮށް، އާސެނަލް ކުރިއަށް ހިނގައްޖެއެވެ. މި މެޗުގައި އުމުރުން 16 އަހަރުގެ މެކްސް ޑައުމަން ވަނީ އޭނާގެ ކެރިއަރުގެ ފުރަތަމަ ބްރޭސް (ދެ ލަނޑު) ކާމިޔާބުކޮށްފައެވެ.

ޕޯޓްމަން ރޯޑްގައި ކުޅުނު މި މެޗުގެ ފުރަތަމަ ލަނޑު 7 ވަނަ މިނެޓުގައި އާސެނަލަށް ޖަހައިދިނީ ޑައުމަންއެވެ. އެބެރެޗީ އެޒޭއާ އެކު ކުޅުނު ވަން-ޓޫ ޕާހަކަށް ފަހު، ސެޑްރިކް ކިޕްރޭ ކައިރިން ނައްޓާލުމަށްފަހު އޭނާ ވަނީ ގޯލުގެ ތިރީ ކަނަށް ބޯޅަ ވައްދާލާފައެވެ. އޭގެ ނުވަ މިނެޓު ފަހުން ނޯނީ މަޑުއޭކޭ ވަނީ އާސެނަލްގެ ދެވަނަ ލަނޑު ކާމިޔާބުކޮށްފައެވެ.

Ad by Hajj Corporation

ދެވަނަ ހާފު ފެށިގެން ދެވަނަ މިނެޓުގައި މާޓިން ޒުބިމެންޑީ ދިން ޕާހަކުން ޑައުމަން އޭނާގެ ދެވަނަ ލަނޑު ޖެހިއިރު، މެޗުގެ އެއް ގަޑިއިރު ހަމަވާން ކައިރިވެފައި ވަނިކޮށް ޑައުމަން ތަނަވަސްކޮށްދިން ފުރުސަތަކުން ކެޕްޓަން މިކޭލް މެރީނޯ ވަނީ އާސެނަލްގެ ހަތަރުވަނަ ލަނޑު ކާމިޔާބުކޮށްފައެވެ. އިޕްސްވިޗްގެ ލަނޑުތައް ޖަހައިދިނީ އަނީސް މެހްމެތީ އަދި ކުރީގެ އާސެނަލްގެ ފޯވާޑް ޗޫބާ އަކްޕޮމްއެވެ.

މި މެޗާއެކު ޑައުމަން ވަނީ ޕްރިމިއާ ލީގުގެ ޓީމަކަށް އެއް މެޗެއްގައި ދެ ލަނޑު ޖަހައިދިން 16 އަހަރުގެ ދެވަނަ ކުޅުންތެރިޔާގެ ޝަރަފު ހޯދާފައެވެ. މީގެ ކުރިން މި ރެކޯޑު ހަދާފައިވަނީ 2002 ވަނަ އަހަރު ވޭން ރޫނީއެވެ. މީގެ އިތުރުން 16 އަހަރާއި 258 ދުވަހުގެ އުމުރުގައި އޭނާ ވެފައިވަނީ އީއެފްއެލް ކަޕުގައި ލަނޑު ޖެހި ދެވަނައަށް އެންމެ ހަގު ކުޅުންތެރިޔާއަށެވެ.