އިންގްލިޝް ޕްރީމިއަރ ލީގުގެ މެޗްޑޭ 08 ގައި ރޭގައިވެސް ވަރުގަދަ މެޗުތަކެއް ކުޅެފިއެވެ. އެގޮތުން މެޗްޑޭ 8 ގައި އެންމެ ފުރަތަމަ ކުޅެފައިވަނީ ބޯންމައުތާއި އާރސެނަލް އެވެ. އާސެނަލްގެ ސަލީބާ އަށް ދެއްކި ރަތްކާޑަށްފަހު މެޗުގެ ބޮޑުބައެއް 10 ކުޅުންތެރިންނާއެކު ކުޅެންޖެހުނު އާރސެނަލް ވަނީ ލީގުގައި ސީޒަންގެ ފުރަތަމަ ބަލި ވެފައެވެ. މި މެޗު ނިމުނީ 2-0 އިން ބޯންމައުތު މޮޅު ވެގެންނެވެ.

ރޭގައި ކުޅުނު އެހެން މެޗުތަކަށް ބަލާއިރު އެވަޓަން ވަނީ މި އަހަރު ޕްރީމިއަރ ލީގަށް ޕްރޮމޯޓުވި އިޕްސްވިޗް ޓައުން އަތުން 0-2 ގެ ނަތީޖާއަކުން މޮޅުވެފައެވެ. ރޭގަ ކުޅުނު މެޗުތަކުގެ ތެރެއިން ސައުތުހެމްޕްޓަން އާއި ލެސްޓަރ ސިޓީ މެޗުވަނީ ފޯރިގަދަ ކުޅުމަކަށްފަހު މެޗު ނިމެން ދަނިކޮށް އަންދްރޭ އަޔޫ ކާމިޔާބު ކުރި ގޯލަކާއެކު ލެސްޓަރ މޮޅުވެފައެވެ. ސައުތުހެމްޓަންގެ ދަނޑުގައި ކުޅުނު މި މެޗު ފެށިގެން ސައުތްހެމްޓަން މޮޅުކުޅުމެއްކުޅެ 2 ގޯލުގެ ލީޑެއް ނަގާފައިވަނިކޮށް ލެސްޓަރ އިންވަނީ މެޗުގެ ދެވަނަ ހާފުގައި ކުޅުން ރަނގަޅުކޮށް ފަހަތުން އަރައި އެޓީމު މޮޅުކޮށްދީފައެވެ.

އެހެންމެޗުތަކަށް ބަލާއިރު ވަރުގަދަ ނިއުކާސަލް ވަނީ އެމީހުންގެ އަމިއްލަ ދަނޑުގައި 0-1 ގެ ބްރައިޓަން އަތުން ވަނީ ބަލިވެފައެވެ. ރޭ ކުޅުނު އެންމެ ވަރުގަދަ އެއްމެޗް ކަމުގައިވާ މެންޗެސްޓަރ ޔުނައިޓެޑް އާއި ބްރެންޓްފޯޓް ބައްދަލު ކުރިމެޗު، މެޗުގެ ފުރަތަމަ ހާފު ނިމެން ގާތްވެފައި ވަނިކޮށް ބްރެންޑްފޯޑުން ވަނީ ލީޑުނަގާފައެވެ. އަދި ދެވަނަ ހާފުގައި މެންޗެސްޓަރ ޔުނައިޓެޑުން ވަނީ ކުޅުން ރަނގަޅުކޮށް ފަހަތުން އަރައި 2 ގޯލް ޖަހައި އެ ޓީމު ވަނީ މޮޅުކޮށްދީފައެވެ. މެންޗެސްޓަރ ގެ ގޯލްތައް ޖަހާފައިވަނީ އާޖެންޓީނާގެ އުއްމީދީ ކުޅުންތެރިޔާ އަލިހަންޑްރޯ ގަނަޗޯ އަދި ރަސްމުސް ހޮއިލަންޑް އެވެ. މިއީ ވޭތުވެދިޔަ އެއްމަސް ތެރޭގައި މެންޗެސްޓަރ ޔުނައިޓެޑުން މޮޅުވި ފުރަތަމަ މެޗެވެ.

ފުލަމް އާއި އެސްޓަންވިލާ ބައްދަލުކުރި މެޗު 1-3 އިން ކާމިޔާބު ކުރީ އެސްޓަންވިލާއެވެ. ސްޕެއިންގެ ތަޖުރިބާކާރު ކޯޗު އުނެއި އެމްރީގެ އިރުޝާދުގެ ދަށުން އެސްޓަންވިލާ އަންނަނީ ލީގުގައި ރަނގަޅު ނަތީޖާތަކެއް ހޯދަމުންނެވެ. އެގޮތުން ކުޅެވުނު 8 މެޗާއެކު އެސްޓޮންވިލާ އޮތީ ލީގު ޓޭބަލްގެ 4 ވަނަގައެވެ. ރޭގައި ކުޅުނު ފަހު މެޗަށް ބަލާއިރު ޓޮޓްނަމް އަދި ވެސްޓްހޭމް ބައްދަލުކުރި މެޗުގައި 18 ވަނަ މިނެޓުގައި ވެސްޓްހޭމް އިން ލީޑު ނަގާފައިވަނިކޮށް ޓޮޓްނަމްވަނީ ފަހަތުން އަރައި 4 ގޯލް ޖަހާފައެވެ.

މިރޭވެސް އިންގްލިޝް ޕްރީމިއަރ ލީގުގައި ފޯރިގަދަ މެޗުތަކެއް ކުޅެވޭނެއެވެ. އެގޮތުން ފުރަތަމަ މެޗުގައި ރާއްޖެގަޑިން އިރުއޮއްސޭ 6:00 ގައި ބައްދަލުކުރާނީ ވުލްވްސް އަދި މެންޗެސްޓަރ ސިޓީއެވެ. މެޗްޑޭ 8 ގައި ކުޅެވޭ އެންމެ ވާދަވެރި މެޗްކަމުގައިވާ ލިވަޕޫލާއި ޗެލްސީ، ލިވަޕޫލްގެ އެންފީލްޑް ސްޓޭޑިއަމްގައި ބައްދަލުކުރާ މެޗް ފަށާނީ ރާއްޖެގަޑިން މިރޭ 08:30 ގައެވެ.