ބޭރުފައިސާ މާރުކުުރުމުގެ ލައިސެންސްއަށް އެދި 98 ފަރާތަކުން ހުށަހަޅައިފިއެވެ.

މިއީ މަނީ ޗޭންޖިންގ ވިޔަފާރިއާބެހޭ ޤަވާއިދުގެ ދަށުން، މޯލްޑިވްސް މަނިޓަރީ އޮޓޯރިޓީން ދޫކުރާ ހުއްދައެކެވެ.

އެމްއެމްއޭއިން ވިދާޅުވީ، އެ އޮޓޯރިޓީން ދޫކޮށްފައިވާ ލައިސަންސެއް ލިބިގެން ދިވެހިރާއްޖޭގައި މަނީ ޗޭންޖިންގ ވިޔަފާރިކުރަމުންދާ ފަރާތްތަކުގެ ތެރެއިން އާ ގަވައިދުގެ ދަށުން ލައިސަންސްއަށް އެދި އެޕްލިކޭޝަން ހުށައެޅުމަށް ހުޅުވާލި މުއްދަތުގެ ތެރޭގައި ލައިސަންސްއަށް އެދި ހުށައަޅާފައިވާ ފަރާތްތަކަށް ލައިސެންސް ދިނުމާއިމެދު އެ އޮތޯރިޓީން ވަކި ގޮތެއް ނިންމައި އަންގަންދެން އެ ފަރާތްތަކަށް ދޫކޮށްފައިވާ ލައިސަންސްގެ ދަށުން ބޭރުފައިސާ ގަނެ ވިއްކުމުގެ ވިޔަފާރި ކުރިއަށްގެންދެވޭނެކަމަށެވެ.

މޯލްޑިވްސް މަނިޓަރީ އޮޓޯރިޓީ، އެމްއެމްއޭއިން ވިދާޅުވީ، ލައިސަންސްއަށް އެދި ހުށައެޅުމުގެ ސުންގަޑި 30 ނޮވެމްބަރ ވަނަ ދުވަހު ހަމަވިއިރު 98 ފަރާތަކުން ލައިސަންސްއަށް އެދި ހުށައަޅާފައިވާކަމަށެވެ.

އެގޮތުން ޓިއާ 1 ލައިސަންސަށް 79 ފަރާތަކުން ވަނީ ހުށައަޅާފައެވެ. މީގެތެރޭގައި މުޅިން އަލަށް ހުށައަޅާފައިވާ 44 ފަރާތަކާއި ކުރިން ލައިސަންސް އޮތް 35 ފަރާތެއް ހިމެނެއެވެ.ޓިއާ2 ލައިސަންސްއަށް އެދި 19 ފަރާތެއް ވަނީ ހުށައަޅާފައެވެ. މީގެތެރޭގައި މުޅިން އަލަށް ލައިސަންސްއަށް އެދި ހުށައަޅާފައިވާ 5 ފަރާތަކާއި، ކުރިން ލައިސަންސް އޮތް 14 ފަރާތަކުން ވަނީ ހުށައަޅާފައެވެ.