ހުޅުމާލޭގައި އެޗްޑީސީން ދެމުން އަންނަ ހިދުމަތްތަކަށް ވުރެ މާރަނގަޅު ހިދުމަތްތަކެއް މާލެ ސިޓީ ކައުންސިލުން ދޭނެ ކަމަށް މާލެ ސިޓީ ކައުންސިލްގެ މޭޔަރު އާދަމް އާޒިމް ވިދޅާުވެއްޖެ އެވެ.

އާޒިމް މިހެން ވިދާޅުވީ މާލެ ސިޓީ ކައުންސިލްގެ 4 ވަނަ ދައުރުގެ 174 ވަނަ ރަސްމީ އާއްމު ޖަލްސާގަ އެވެ.

ހުޅުމާލޭ މުނިސިޕަލް ޚިދުމަތްތައް މާލޭ ސިޓީ ކައުންސިލްގެ ދަށައް ބަދަލުކުރުމުގެ މަސައްކަތް ވަނީ ފަށާފަ އެވެ.

މާލެ ސިޓީ ކައުންސިލްގެ މިއަދުގެ ޖަލްސާގައި އާޒިމް ވިދާޅުވީ އެޗްޑީސީން ހުޅުމާލޭގައި މިހާރު ދެމުން އަންނަ ހިދުމަތްތަކަށްވުރެ މާ ފެންވަރު ރަނގަޅު އަދި މާ ހިއްފަސޭހަ ހިދުމަތްތަކެއް މާލެ ސިޓީ ކައުންސިލްގެ މެމްބަރުން ދޭއްވާނެ ކަމުގެ ފުރިހަމަ ޔަގީންކަން އެބައޮތް ކަމަށެވެ. އާޒިމް ވިދާޅުވީ މާލެ ސިޓީ ކައުންސިލްގެ މެމްބަރުންނަކީ މަސައްކަތްތެރި އަދި ހަރަކާތްތެރި މެމްބަރުންތަކެއް ކަމަށެވެ. އެހެންވީމާ އެމެމްބަރުންނާއި މެދު ފުރިހަމަ އިތުބާރު އެބައޮތް ކަމަށް އާޒިމް ވިދާޅުވި އެވެ.

އާޒިމް ވިދާޅުވީ މާލެ ސިޓީ ކައުންސިލުން ހުޅުމާލޭއަކީ ހިއްފަސޭހަ މާރީތި އަދި މިހާރަށްވުރެ މާރަނގަޅު ހިދުމަތްތަކެއް ރައްޔިތުންނަށް ލިބޭ ތަނެއްގެ ގޮތުގައި މާލެ ސިޓީ ކައުންސިލުން ހަދާނެ ކަމުގެ ފުރިހަމަ ޔަގީންކަން އެބައޮތް ކަމަށެވެ.އަދި އެކަން ހުޅުމާލެ ރައްޔިތުންވެސް ބޭނުންވާ ކަމަށް އާޒިމް ވިދާޅުވި އެވެ.

އަޅުގަނޑު ދޭ ޔަގީން ކަމަކީ އެޗްޑީސީ އަށް ވުރެ މާ ރަނގަޅު ހިދުމަތެއް މާލެ ސިޓީ ކައުންސިލުން ދޭނެ މިކައުންސިލްގެ މެމްބަރުން ދޭނެ އެކަމުގައި 100 ޕަސެންޓު ޔަގީންކަން އެބޮތް މިތިބަ ހުރިހާ މެމްބަރުންނަށް ބަލާލީމަ ހަރަކާތްތެރި މެމްބަރުންތަކެއް މީ އަޅުގަނޑަށް 100 ޕަސެންޓު ޔަގީންކަން އެބޮތް ހުޅުމާލެއަކީ އެއަށްވުރެ މާ ރަނގަޅު މާ ހިއްފަސޭހަ މާރީތި މާ ރަނގަޅު ހިދުމަތެއް ރައްޔިތުންނަށް ލިބޭ ތަނެއްގެ ގޮތުގަ ސިޓީ ކައުންސިލުން ހަދާނެ ކަމުގެ ފުރިހަމަ ޔަގީންކަން އެބޮތް

މާލެ ސިޓީ ކައުންސިލްގެ މެމްބަރުންގެ މަސައްކަތް ރައްޔިތުން ބަލައިގެންފައިވާ ކަމަށް އާޒިމް ވިދާޅުވި އެވެ. އެހެންވެ އެޗްޑިސީގެ މުނިސިޕަލް ސާވިސް މާލެސިޓީ ކައުންސިލްގެ ދަށަށް ބަދަލްކުރަން ރައްޔިތުން ބޭނުންވާ ކަމަށްވެސް އާޒިމް ވިދާޅުވި އެވެ. އުންމީދަކީ ރައީސް މުއިއްޒު ވިދާޅުވި ގޮތަށް އެޗްޑީސްވެސް އަމަލުކޮށް އަދި ފިނޭންސްއިންވެސް އެއްބާރުލުންދީ މިކަންކަން އަވަހަށް ނިމިގެން ދިއުންކަމަށް އާޒިމް ވިދާޅުވި އެވެ.

ހުޅުމާލޭގެ މުނިސިޕަލް ހިދުމަތްތައް މާލެ ސިޓީ ކައުންސިލްގެ ދަށަށް ބަދަލުކުރުމަކީ ރައީސުލްޖުމްހޫރިއްޔާ ޑރ.މުޙައްމަދު މުއިއްޒުގެ ރިޔާސީ ވަޢުދުފުޅެކެވެ. އަދި އެކަމާއި ގުޅޭ އެއްބަސްވުމުގައި މިއަހަރުގެ ޖަނަވަރީ މަހު ވަނީ ސޮއިކޮށްފަ އެވެ.