އާސަންދައިން މިއަދު ނެރުނު އިއުލާނެއްގައި، އެ ކުންފުނިން ކަވަރުކުރާ އެއްވެސް ބޭހަކަށް ފާމަސީތަކުން އަގު ނަގާނަމަ އެކަން ވައިބަރ ނުވަތަ ވަޓްސްއެޕް މެދުވެރިކޮށް 7951400 ނަންބަރަށް އަންގައިދިނުމަށް އެދިއްޖެއެވެ.

އާސަންދައިން ބުނި ގޮތުގައި، އާސަންދައިން ނުލިބޭ ބޭހެއްނަމަ އެކަން ބޭސް ސިޓީގައި ލިޔެފައި އޮންނާނެއެވެ. މީގެ އިތުރުން، ބަލްކް ޕްރޮކިއުމެންޓު މެދުވެރިކޮށް ރާއްޖެއަށް އެތެރެކުރާ ހުރިހާ ބޭހެއްވެސް އާސަންދަ ޚިދުމަތްދޭ ފާމަސީތަކުން ފޯރުކޮށްދޭނީ ހިލޭކަން އެ ކުންފުނިން ފާހަގަކޮށްފައިވެއެވެ.

ވޭތުވެދިޔަ އަހަރުތަކުގައި އާސަންދައިން ކޮށްފައިވާ ޚަރަދުތަކުގެ ތެރެއިން %60 ޚަރަދުކޮށްފައިވަނީ ހަމައެކަނި ބޭސް ވިއްކުމަށް ކަމަށް ސިއްޙަތާ ބެހޭ ވަޒީރު ޢަބްދުﷲ ނާޡިމް އިބްރާހީމް ވަނީ މީގެ ކުރިން ވިދާޅުވެފައެވެ. ނަމަވެސް ބޭހުގެ އަގުތައް ދުނިޔޭގެ ނިސްބަތުން އަޅާބަލާއިރު ބޮޑުކަމަށާއި މިކަން މިހެންވެފައިއޮތީ އާސަންދަ ނިޒާމުގައި ބަލަންޖެހޭ ކަންކަން ނުބަލާ އަޅަންޖެހޭ ފިޔަވަޅުތައް އަޅާފައި ނެތުމުގެ ސަބަބުންކަން ވަޒީރު ފާހަގަކުރެއްވިއެވެ.

ސަރުކާރުން މިހާރު ދަނީ ދައުލަތުގެ މާލީ ނިޒާމު އިސްލާހުކުރުމުގެ ގޮތުން އާސަންދައިގެ ނިޒާމަށް ބޮޑެތި ބަދަލުތަކެއް ގެންނަމުންނެވެ. މި ބަދަލުތަކުގެ ތެރޭގައި އާސަންދައިން ދޫކުރާ، އާންމުން އެންމެ ގިނައިން ބޭނުންކުރާ 250 ބޭހުގެ އަގު ކޮންޓްރޯލުކުރުން ހިމެނެއެވެ.