ވޮލީބޯލް އެސޯސިއޭޝަނުން އިންތިޒާމްކޮށްގެން ރާއްޖޭގެ ސްކޫލްތަކަށް އަމާޒުކޮށްގެން ބާއްވާ އިންޓަރ ސްކޫލް ވޮލީބޯޅަ މުބާރާތުގެ އަންޑަރ 14 ގެ އަންހެން ޗެންޕިއަންކަން ފާފު އަތޮޅު ސްކޫލް ހޯދައިފިއެވެ.

މި މުބާރާތުގެ އަންޑަރ 14 އަންހެން ކެޓަގަރީ ފައިނަލުގައިފާފު އަތޮޅު ސްކޫލް ވާދަކޮށްފައިވަނީ މަޑިފުށީ ސްކޫލާ ދެކޮޅަށެވެ. އެގޮތުން މަޑިފުށި ސްކޫލް 1 ސެޓު ހޯދާފައިވަނިކޮށް ފާފު އަތޮޅު ސްކޫލުން ވަނީ ފަހަތުން އަރައި 3 ސެޓު ކާމިޔާބުކޮށް މުބާރާތުގެ ޗެންޕިއަންކަން ހޯދާފައެވެ.

މަޑިފުށީ ސްކޫލުން ފުރަތަމަ ސެޓު ކާމިޔާބުކުރީ 22-25 އިންނެވެ. އަދި ފާފު އަތޮޅު ސްކޫލުން ސެޓުތައް ކާމިޔާބުކޮށްފައިވަނީ 21-25، 20-25 އަދި 14-25 އިންނެވެ.

އަދި މީގެ އިތުރުން ފާފު އަތޮޅު ސްކޫލް ވަނީ މި މުބާރާތުގެ އަންޑަރ 16 އަންހެން ކެޓަގަރީގެ ފައިނަލުގައި ވޭމަންޑޫ ސްކޫލާއި ވާދަކޮށް އެ ކެޓަގަރީގެ ޗެންޕިއަންކަން ހޯދާފައެވެ. މިއީ މި ކެޓަގަރީގެ ޗެންޕިއަންކަން ޖެހިޖެހިގެން ފާފު އަތޮޅު ސްކޫލުން ކާމިޔާބުކުރި ތިންވަނަ ފަހަރެވެ. މީގެ އިތުރުން އަންޑަރ 14 ގެ ފިރިހެން ކެޓަގަރީގެ 3 ވަނަވެސް ހޯދީ ފާފު އަތޮޅު ސްކޫލުންނެވެ.