މި މަހުގެ 18ގައި ފަށާ ކާވާ ވޮލީބޯޅަ މުބާރާތުގައި ވާދަކުރާ ރާއްޖޭގެ ސީނިއާ ފިރިހެން ވޮލީބޯޅަ ޓީމުގެ ޖާޒީތައް ހަވާލުކޮށްފިއެވެ.

ހުޅުމާލެ ސިންތެޓިކް ޓްރެކުގައި ރޭ އޮތް ޚާއްސަ ރަސްމިއްޔާތެއްގައި އެ ޖާޒީތައް ޓީމާ ހަވާލުކޮށްދެއްވީ ކުޅިވަރާއި ހަށިހެޔޮ ކަމާ ބެހޭ ވަޒީރު އަބްދުﷲ ރާފިއުއެވެ. އަދި އެ ރަސްމިއްޔާތުގައި ކޮމިޝަނަރ އޮފް ސްޕޯޓްސް މުޙައްމަދު ޠަލާލްގެ އިތުރުން، ބޯޅަ އެސޯސިއޭޝަން އޮފް މޯލްޑިވްސް (ވީއޭއެމް)ގެ ރައީސް މުޙައްމަދު ލަތީފް އަދި އިސްވެރިން ވަނީ ބައިވެރިވެވަޑައިގަންނަވައިފައެވެ.

ކާވާގެ މުބާރާތް އޮންނާނީ މި މަހުގެ 18 އިން 24 ގެ ނިޔަލަށް އުޒްބަކިސްތާނުގައެވެ. އެ މުބާރާތުގައި ރާއްޖޭގެ އިތުރުން ވާދަކުރާނީ، ތުރުކެމިނިސްތާން، ތަޖަކިސްތާން، ނޭޕާލް، އަފްޣާނިސްތާން، އަދި މުބާރާތް ބާއްވާ ޤައުމު އުޒްބަކިސްތާންއެވެ.