ހަވަރު ސްޕޯޓްސްއިން އިންތިޒާމްކޮށްގެން މުޅި ހުވަދު އަތޮޅަށް ހުޅުވާލައިގެން ބާއްވާ "ތިނަދޫ ސިޓީ ކައުންސިލް ފުޓްސަލް މުބާރާތް 2024" ގެ ފައިނަލުމެޗު ކުޅެން ތައްޔާރުވެއްޖެއެވެ. މި މުބާރާތުގެ ފައިނަލުގައި ވާދަކުރާނީ ދަޑެކޮޑޭ ރެކްރިއޭޝަން ކުލަބު (ޑީ.އާރު.ސީ) އާއި އޭ.އެސް.އެމް.އެޗު.އާރުސީ އެވެ.

މުބާރާތުގެ ފައިނަލަށް އޭ.އެސް.އެމް.އެޗު.އާރު.ސީ ދަތުރުކުރީ ސެމީގައި އައުޓްލޯޒް ބަލިކޮށްފައެވެ. އަދި ޑީ.އާ.ރުސީ ފައިނަލުން ޖާގާ ހޯދީ ސެމީފައިނަލުގައި ޓީމު 401 ބަލިކޮށްގެންނެވެ. މިއީ ޖެހިޖެހިގެން މިމުބާރާތުގެ ފައިނަލަށް ޑީ.އާ.ރުސީ ދަތުރުކުރި ދެވަނަފަހަރެވެ. މި މުބާރާތުގެ އެންމެ ފަހުގެ ޗެންޕިއަންއަކީވެސް ޑީ.އާ.ރުސީއެވެ.

މިއަހަރުގެ މިމުބާރާތުގައި ޖުމްލަ 12 ޓީމަކުން ބައިވެރިވެފައިވެއެވެ. މުބާރާތުގެ ގްރޫޕް ސްޓޭޖު ކުރިޔަށް ގެންގޮސްފައިވަނީ 3 ގްރޫޕަކަށް ބަހާލައިގެންނެވެ. އަދި ކޮންމެ ގްރޫޕެއްގެ އެންމެ މޮޅު 2 ޓީމު ކުއާޓަރ ފައިނަލަށް ދަތުރުކުރިއިރު، ކުއާޓަރ ފައިނަލުގެ އަނެއް 2 ޖާގަ ލިބުނީ ގްރޫޕް ސްޓޭޖުގެ ތިންވަނަ ހޯދާ ޓީމުތަކުގެ ތެރެއިން އެންމެ ނަތީޖާ ރަނގަޅު 2 ޓީމަކަށެވެ.

މި މުބާރާތުގައި ތިނަދޫގެ އިތުރުން ވިލިނގިލި އާއި މަޑަވެއްޔާއި ކޮނޑޭ އާއި ހަވޮއްޑާ ރިސޯޓުގެ ޓީމުތައް ބައިވެރިވެފައިވެއެވެ.

މި މުބާރާތުގެ ޗެންޕިއަން ޓީމަށް 50،000 އަދި ރަނަރަޕް ޓީމަށް 25،000 ރުފިޔާގެ ފައިސާގެ އިނާމެއް ހުށައެޅިފައިވެއެވެ. ފައިނަލް މެޗު އޮންނާނީ މިރޭ 20:15 ގައި ރ އަވަށު ފުޓްސަލް ގްރައުންޑުގައެވެ.