2027 ވަނައަހަރުގައި ބާއްވަން ހަމަޖެހިފައިވާ އޭ.އެފް.ސީ އޭސިއަންކަޕް ކޮލިފައިން ގައި ރާއްޖޭގެ ޓީމު ތަޖިކިސްތާނާއި ޕިލިޕީންސް އާއި އީސްޓް ޓިމޯ އާއި އެއްގުރޫޕެއްގައި ލައްވާލައިފިއެވެ.މި މުބާރާތުގެ ކޮލިފިކޭޝަންގައި 6 ގުރޫޕެއްގައި 24 ޓީމު ވާދަކުރާނެއެވެ.

މި މުބާރާތުގައި ރާއްޖެއާއި އެއްގުރޫޕެއްގައި އެންމެ ވަރުގަދަ ޓީމަކަށްއޮތީ މިދިޔަ އަހަރުގެ މި މުބާރާތުގެ ކުއާޓަރ ފައިނަލްކުޅުނު ތަޖިކިސްތާނެވެ. ރާއްޖޭގެ ޤައުމީޓީމު ވަނީ މިހާތަނަށް ތަޖިކިސްތާނާ ދެކޮޅަށް 3 މެޗު ކުޅެ 2 މެޗުން ބަލިވެފައެވެ.

މިއީ މި މުބާރާތުގެ ކޮލިފިކޭޝަންގެ ތިންވަނަ ރައުންޑެވެ. އެގޮތުން ކޮންމެ ގްރޫޕެއްގެ އެއްވަނައަށްދާ ޓީމަށް އޭ.އެފް.ސީ އޭސިއަންކަޕުން ޖާގަލިބޭނެއެވެ. ކޮލިފިކޭޝަން މެޗުތައް ކުޅެންހަމަޖެހިފައިވަނީ އަންނަ އަހަރުގެ މާޗުމަހުގެ 25 ން 2026 ވަނަ އަހަރުގެ މާޗުމަހާ ދޭތެރޭގައެވެ.

މުބާރާތުގެ ގްރޫޕްތައް ބެހިފައިވާގޮތް. ފޮޓޯ: އޭ.އެފް.ސީ

މީގެއިތުރުން މި މުބާރާތުގެ ކޮލިފިކޭޝަންގައި އިންޑިޔާ އާއި ބަންގްލަދޭޝް ވެސް ވަނީ އެއްގުރޫޕެއްގައި ލައްވާލާފައެވެ. އަދި ޝްރީލަންކާއާއި ތައިލެންޑު ލައްވާލާފައިވަނީ ގްރޫޕް ޑީ ގައެވެ.

މި މުބާރާތަށް މިހާތަނަށް 18 ޓީމަކުން ކޮލިފައިވެފައިވާއިރު މުބާރާތް އެންމެ ގިނަފަހަރު ކާމިޔާބުކޮށްފައިވަނީ މި މުބާރާތް މިފަހަރު ހޯސްޓުކުރާ ސަޢޫދީ އަރަބިއްޔާއެވެ. މި މުބާރާތް އެންމެފަހުން ކާމިޔާބުކުރީ ޤަތަރުންނެވެ.