ކުރިން ލަފާކުރި ވަރަށްވުރެ އިތުރަށް ޖީޑީޕީ ކުރިއަރާނެ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ލަފާކޮށްފި އެވެ.

އެމްއެމްއޭ އިން ނެރުނު ނޮވެމްބަރު މަހުގެ އިކޮނޮމިކް އަޕްޑޭޓްގައި އުމީ އުފެއްދުންތެރިކަން، ރިއަލް ޖީޑީޕީ މިއަހަރު 5.5 ޕަސެންޓް ކުރި އަރާނެ ކަމަށް ވަނީ ލަފާކޮށްފައެވެ.

މިލަފާކުރުން ހިމަނާފައިވުމާއެކު މިއީ މިއަހަރު ޖީޑީޕީ ކުރި އަރާނެ ކަމަށް ކުރިން ލަފާކުރި މިންވަރަށްވުރެ އިތުރުވުމެއްކަން ފާހަގަކޮށްލެވެއެވެ.

އެމްއެމްއޭއިން މިއަހަރުގެ މޭ މަހު ލަފާކޮށްފައި ވަނީ ޖީޑީޕީ ކުރިއަރާނީ 4.9 ޕަސެންޓަށެވެ.

މިކުރިއެރުން ލިބޭނެކަމަށް އެމްއެމްއޭއިން ފާހަގަކޮށްފައިވަނީ ފަތުރުވެރިކަމާއި ދަތުރުފަތުރު އަދި މުއާސަލާތީ ދާއިރާ ފުޅާވެ އެކަމުން އިގުތިސާދަށް ކުރާ ރަނގަޅު އަސަރުތަކުގެ ސަބަބުންކަމަށެވެ.

މިގޮތުން ޓޫރިޒަމް ސިނާއަތުގައި މިދިޔަ އަހަރާއި އަޅާބަލާއިރު މިއަހަރުގެ މި މުއްދަތުގައި ޒިޔާރަތްކުރި ފަތުރުވެރިންގެ އަދަދު ވަނީ އިތުރުވެ، މި އަހަރުގެ ޓާގެޓަށް ރީޗް ވެވިފައެވެ.