ރާއްޖޭގެ ޕޯޓްތައް ގަވާއިދުން އޮޑިޓް ކުރާ ކަމަށް މިނިސްޓްރީ ބުނެފިއެވެ.

ޓްރާންސްޕޯޓް މިނިސްޓްރީން މިކަން ހާމަކޮށްފައިވަނީ މިދިޔަ އޮކްޓޯބަރު މަސް ތެރޭގައި ހޯކްސް ޕްރައިވެޑް ލިމިޓެޑްގެ ބޯޓެއް ކަމަށްވާ, "އެމްޓީ ހޯކްސް ޖަވާހިރު" ނަމަކަށް ކިޔާ ބޯޓަކުން ވަގަށް ރާއްޖެ އަށް އެތެރެކުރި ގިނަ އަދަދެއްގެ ސިނގިރޭޓްގެ މައްސަލާގައި ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީ (241 ކޮމިޓީ) އަށް ހާޟިރުވެ ދެއްކި ވާހަކަފުޅުގައެވެ.

ހޯކްސްއަކީ ތެޔޮ އެތެރެކޮސް ވިޔަފާރިކުރަމަށް މަޝްހޫރު ކުންފުންޏަކަށްވާއިރު ދުންފަތުގެ އިސްތިއުމާލު ކުރުމަށް ބޭނުންކުރާ އެއްވެސް ބާވަތެއް އެތެރެކުރުމުގެ އެއްވެސް ވިޔަފާރިއެއް ބައިވެރިވުމެއް އަދި އެފަދަ އެއްވެސް ޝައުގުވެރިކަމެއް ނެތް ކަމަށް އެ ކުންފުނިން ބުނެ އެވެ.

--

ކޮމިޓީ ބައްދަލުވުމުގައި މެމްބަރަކު ކުރެއްވި ސުވާލަކަށް ޖަވާބު ދެއްވަމުން ލަތީފް ވިދާޅުވީ، މިނިސްޓްރީގެ މެންޑޭޓުގައި އޮންނަނީ އޮޑިޓް ކުރުން ކަމަށެވެ. އެގޮތުން ކޮންމެ އަހަރަކުވެސް ގަވާއިދުން އޮޑިޓް ކުރަމުންދާ ކަމަށް އޭނާ ވިދާޅުވި އެވެ. އަދި އޮޑިޓް ކުރާއިރު ގައިޑްލައިނަކަށް ބަލަނީ އޭއެސްޕީއެފް ކޯޑު ކަމަށް ވެސް ވިދާޅުވި އެވެ.

އިތުރަށް އޭނާ ވިދާޅުވީ، ޕޯޓްތަކުގައި ސީސީޓީވީ ކެމެރާއިން ސަރަހައްދު ކަވާ ނުކުރާނަމަ، މިހާރުވެސް އެ ސަރަހައްދުތައް ކަވާކުރުމަށް ލަފާ ދެވިދާނެ ކަމަށެވެ. މިހާރު އަމަލުކުރަމުންދާ ގޮތުން ހުރިހާ ޕޯޓް ފެސިލިޓީއެއް ސީސީޓީވީ ކެމެރާއިން ކަވާ ކުރެވޭކަން ފާހަގަ ކުރައްވާ، އެ ފުޓޭޖްތައް 90 ދުވަހަށް ބެކަޕް ކުރެވިފައި ހުންނާނެކަމަށް ވެސް ލަތީފް ވިދާޅުވި އެވެ.

އޮޑިޓްގައި މުޅި ސަރަހައްދު ކެމެރާއަށް ކަވާ ނުވާކަން ފާހަގަ ކުރެވިއްޖެނަމަ، އެ ސަރަހައްދެއް ކަވާ ކުރެވޭ ގޮތަށް ކެމެރާތައް ބަހައްޓާ ކަމަށް ޓްރާންސްޕޯޓް މިނިސްޓްރީއިން މިއަދު ބުނެފި އެވެ.