މެންޗެސްޓަރ ސިޓީ އާއި ދެކޮޅަށް ކުރެވޭ ތުހުމަތުތަކާއި ގުޅިގެން ޕްރިމިއަރ ލީގުން ކުރާ 115 ދައުވާތަކުގެ އަޑުއެހުންތައް ނިމުމަކަށް އައިސްފިއެވެ. ސެޕްޓެމްބަރު މަހުގެ 15 ގައި ފެށި މި އަޑުއެހުންތައް ނިމި ހުކުމަކާއި ގާތަށް އައިސްފާއިވާކަމަށް ރިޕޯޓްތައް ބުނަންފަށައިފިއެވެ.

ސެޕްޓެމްބަރ 16 އިން ފެށިގެން ލަންޑަނުގެ އިންޓަނޭޝަނަލް ޑިސްޕިއުޓް ރެޒޮލިއުޝަން ސެންޓަރުގައި ކުރިއަށް ގެންދެވުނު މި އަޑުއެހުންތަކުގައި، ދެފަރާތުންވެސް އެންމެ ފަހުގެ ހުށަހެޅުންތައް ވަނީ ހުށަހަޅާފައެވެ. ނަމަވެސް މި މައްސަލައިގެ ނަތީޖާ 2025 ވަނަ އަހަރުގެ ކުރިން އިޢުލާނު ކުރެވޭނެކަމަކަށް ނުބެލެވެއެވެ. މި މައްސަލަ ބެލީ މިނިވަން ޕެނަލަކުންނެވެ. އަދި ދަޢުވާގެ އަޑުއެހުންތައް ކުރިއަށް ގެންދެވިފައިވަނީ ސިއްރު ގޮތެއްގައެވެ.

މެންޗެސްޓަރ ސިޓީން ވަނީ މި ހުރިހާ ތުހުމަތުތަކެއް ވަރަށް ހަރުކަށި ގޮތެއްގައި ދޮގުކޮށްފައެވެ. ނަމަވެސް މި ތުހުމަތުތަކުގެ ކުށްވެރިވެއްޖެނަމަ، މިހާރުގެ ޕްރިމިއަރ ލީގު ޗެމްޕިއަނުންނަށް ކުރިމަތިވެދާނެ އެންމެ ބޮޑު އަދަބަކީ ލީގުން ރެލިގޭޓްކުރުމެވެ. އަދި މިމައްސަލައިގައި ކުއްވެރިވެއްޖެނަމަ ބޮޑެތި އަދަދުތަކުން ޖޫރިމަނާ އައުމަކީ ވަރަށް ގާތްކަމެކެވެ.

މެންޗެސްޓަރ ސިޓީއާ ދެކޮޅަށް ކުރެވިފައިވާ ތުހުމަތުތަކުގެ ތެރޭގައި 2009 އިން 2018 އަށް ހިމެނޭ މާލީ މަޢުލޫމާތުތައް ސައްޙަކޮށް ހުށަނާޅާ ކަމަށް ބުނެފައިވެއެވެ. ޚާއްޞަކޮށް ސްޕޮންސަރޝިޕް އާމްދަނީއާއި ކުޅުންތެރިންނާއި މެނޭޖަރުންގެ މުސާރައިގެ ތަފްޞީލުތަކާ ގުޅޭ މަޢުލޫމާތުތަކެވެ. މީގެ އިތުރުން ޕްރިމިއަރ ލީގާއި ޔުއެފާގެ މާލީ ދެމެހެއްޓެނިވިކަމުގެ ޤަވާޢިދުތަކާ ޚިލާފުވެފައިވާ ކަމަށާއި، ލީގުގެ ތަޙްޤީޤުތަކަށް ހުރަސްއަޅާފައިވާކަމަށްވެސް ތުހުމަތުކުރެވެއެވެ.