މިއަދު ހެނދުނު ހިނގި އަލިފާނުގެ ހާދިސާގެ ސަބަބުން ހައުސިން މިނިސްޓްރީއާއި އިންފްރާސްޓަރަކްޗާ މިނިސްޓްރީގެ އިތުރުން އެންވާރަމެންޓް މިނިސްޓްރީއަށް ވެސް ބޮޑެތި ގެއްލުންތަކެއް ލިބި, އެ ތިން މިނިސްޓްރީގެ މަސައްކަތްތައް ވަގުތީ ގޮތުން ހުއްޓުމަކަށް އަތުވެއްޖެއެވެ.

މި ހާދިސާގައި ހައުސިން މިނިސްޓްރީއާއި އިންފްރާސްޓްރަކްޗަރު މިނިސްޓްރީ ހިންގާ އިމާރާތް ވަނީ ބޭނުންނުކުރެވޭ ވަރަށް އަނދާ ހުލިވެފައެވެ. ހައުސިން މިނިސްޓްރީގެ އިމާރާތުގެ ތެރޭގައި މާލޭ ސިޓީ ކައުންސިލްގެ އިދާރާއެއް ވެސް ދިޔައީ ހިންގަމުންނެވެ.

އަދި އަލިފާނުގެ އަސަރު ވަރަށް ބޮޑަށްކޮށް, އެންވާރަމެންޓް މިނިސްޓްރީއަށް ވެސް ވަނީ ގެއްލުންތަކެއް ލިބިފައެވެ.

އެ ސަރަހައްދުގައި ހުންނަ ސިޓީ ކައުންސިލްގެ ވައިޓަލް ރެޖިސްޓްރޭޝަން އޮފީހަކީ އުފަންވުމާއި މަރުގެ ރެޖިސްޓްރޭޝަންތަކާއި ލިޔެކިޔުންތަކުގެ އިތުރުން ރަށްވެހިކަމާއި ގޯތިތަކުގެ ރެޖިސްޓްރޭޝަން ވެސް ބަލަހައްޓަމުން އަންނަ ތަނެވެ.

އަލިފާން ރޯވި ސަހަރައްދުގައި ހުންނަވައި، މާލޭ ސިޓީ ކައުންސިލްގެ ޑެޕިއުޓީ މޭޔަރު އަހުމަދު ނަރީޝް ވިދާޅުވީ، އެ އިމާރާތުގެ ތެރޭގައި 1960 އިން ފަށައިގެން މާލޭގައި އުފަންވި އެންމެންގެ ލިޔެކިޔުންތަކާއި ގެދޮރުގެ ރެޖިސްޓްރޭޝަންތައް ހުންނާނެ ކަމަށެވެ.

އަލިފާންގަނޑު ވަރަށް ބޮޑަށް މިހާރު ވަނީ ކޮންޓްރޯލް ކޮށްފައެވެ. ނަމަވެސް އެ ސަރަހައްދުގައި ދުމުގެ އަސަރު ވަރަށް ބޮޑެވެ.