ހުޅުމާލެ ފޭސް 2 ގައި ހުންނަ ހިޔާ ގެދޮރުވެރިކަމުގެ މަޝްރޫޢުގެ ޓަވަރެއްގެ އެޕާޓްމަންޓެއްގައި 23 އޮކްޓޫބަރުވީ ހުކުރު ދުވަހު ހަވީރު އަލިފާނުގެ ހާދިސާއެއް ހިނގައި ބޮޑެތި ގެއްލުންތަކެއް ލިބިއްޖެއެވެ.

މި ހާދިސާ ހިނގާފައިވަނީ ހިޔާ 11 ވަނަ ޓަވަރުގެ 23 ވަނަ ފަންގިފިލާގައި ހުންނަ އެޕާޓްމަންޓެއްގައެވެ. މިކަމާ ގުޅިގެން ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ވަނީ ވަގުތުން އެ ސަރަހައްދަށް ގޮސް ހަރަކާތްތެރިވެފައެވެ.

Ad by Hajj Corporation

އެންޑީއެމްއޭއިން ބުނީ މި އަލިފާނުގެ ހާދިސާގެ ސަބަބުން އެ އެޕާޓްމަންޓްގެ ބަދިގެ ވަނީ މުޅިން ބޭނުން ނުކުރެވޭ ވަރަށް އަނދައިގެން ގޮސްފައިވާ ކަމަށެވެ. އަދި މުޅި ގޭގައި ދުމުގެ އަސަރު ގަދަވުމުގެ ސަބަބުން، އެ ތަނުގައި ދިރިއުޅޭ ހަތަރު މީހަކަށް ވަނީ އެހީތެރިކަން ފޯރުކޮށްދީފައެވެ. އެގޮތުން އެ މީހުންނަށް އެއް ދުވަހުގެ ވަގުތީ ބޯހިޔާވަހިކަމާއި، ފަސް ދުވަހުގެ ކެއިންބުއިމުގެ އިންތިޒާމު އެ އޮތޯރިޓީން ވަނީ ހަމަޖައްސައިދީފައެވެ.

މި ހާދިސާގައި އެއްވެސް މީހަކަށް ޖިސްމާނީ އަނިޔާއެއް ލިބިފައި ނުވާކަން ކަމާބެހޭ ފަރާތްތަކުން ވަނީ ކަށަވަރުކޮށްދީފަ އެވެ.