ހައުސިން މިނިސްޓްރީ ހިމެނޭހެން ތިން މިނިސްޓްރީއެއްގައި އާދީއްތަ ދުވަހު ހެނދުނު ހިނގި އަލިފާނުގެ ހާދިސާގައި ރަށްރަށުގެ ލޭންޑް ޔޫސް ޕްލޭނާ ގުޅުން ހުރި ބައެއް ލިޔެކިޔުންތައް ގެއްލިފައިވާ ކަމަށް ހައުސިން މިނިސްޓަރު ޑރ. އަލީ ހައިދަރު މިއަދު ވިދާޅުވެއްޖެއެވެ.

Ad by Hajj Corporation

ދަރުބާރުގޭގައި ހުންނަވާ މީޑިއާއަކުން ކުރި ސުވާލަކަށް ޖަވާބުދެއްވަމުން މިނިސްޓަރު ހައިދަރު ވިދާޅުވީ، މި ހާދިސާގައި އެ މިނިސްޓްރީގައި ހުރި ގިނަ ޑޮކިއުމަންޓުތަކާއި ސާވަރުގައި ރައްކާކޮށްފައި ހުރި މަޢުލޫމާތުތައް ގެއްލިފައިވާ ކަމަށެވެ.

އޭގެ ތެރޭގައި ރަށްރަށުގެ ލޭންޑް ޔޫސް ޕްލޭންގެ މަޢުލޫމާތުތަކާއި އެއާ ގުޅުން ހުރި ލިޔެކިޔުންތައް ހިމެނޭ ކަމަށް މިނިސްޓަރު ފާހަގަކުރެއްވިއެވެ.

"އެހެން ހުރިހާ އެއްޗިއްސަކީ އެއީ ކްލައުޑް ސާވަރުގައި ރައްކާކުރަމުން ދިޔަ މަޢުލޫމާތެއް ނޫން. އެހެންވީމާ އެ އެއްޗެހިތައް ގެއްލިގެންދާނެ. ވަކިން ޚާއްސަކޮށް ރަށްރަށުގެ ލޭންޑް ޔޫސް ޕްލޭންގެ ހުރި މަޢުލޫމާތުތަކާ އެއްޗެހި،" މިނިސްޓަރު ވިދާޅުވިއެވެ.

ނަމަވެސް، މިނިސްޓަރު ހައިދަރު ވިދާޅުވީ ލޭންޑް ޔޫސް ޕްލޭންގެ މަޢުލޫމާތުތައް ހަމައެކަނި މިނިސްޓްރީން ރައްކާކުރާ އެއްޗެއް ނޫން ކަމަށާއި، ކޮންމެ ކައުންސިލަކުން ވެސް މި މަޢުލޫމާތުތައް ރައްކާކުރަމުންދާނެ ކަމަށެވެ. އެހެންނަމަވެސް، އެއާ އެކީގައި ހުރި ލިޔެކިޔުންތަކާއި ބަދަލުކުރެވުނު ލިޔެކިޔުންތައް ގެއްލިގެން ދިޔަކަން އެމަނިކުފާނު ފާހަގަކުރެއްވިއެވެ.

މި އަލިފާނުގެ ހާދިސާގައި ތިން މިނިސްޓްރީއެއް ހިންގި އިމާރާތަށް ގެއްލުންވެފައިވާއިރު، އެ މިނިސްޓްރީތަކުގެ ޚިދުމަތްތައް ވަގުތީ ގޮތުން ވަނީ މެދުކެނޑިފައެވެ. އެހެންކަމުން، އަލުން ޚިދުމަތްތައް ފެށުމަށްޓަކައި ދަރުބާރުގޭގައި ވަގުތީ އޮފީސްތައް ގާއިމުކޮށް، ޚިދުމަތްތައް ފެށުމުގެ މަސައްކަތް ކުރަމުންދާ ކަމަށް މިނިސްޓަރު ވިދާޅުވިއެވެ.

މި ހާދިސާގައި އެއްވެސް މީހަކަށް އަނިޔާވެފައެއް ނުވާއިރު، އަލިފާނުގެ ހާދިސާއާ ގުޅިގެން އެ ސަރަހައްދުގައި ހުރި ގެތަކުން ނުކުންނަން ޖެހިފައިވާ 50 މީހަކަށް ވަނީ ސޯޝަލް ސެންޓަރުން ވަގުތީ ގޮތުން ބޯހިޔާވަހިކަން ފޯރުކޮށްދީފައެވެ.