ހޭންޑް ބޯލް މޯލްޑިވްސް އިން އިންތިޒާމްކޮށްގެން ބޭއްވި އިންޓަރ ސްކޫލް ހޭންޑްބޯޅަ މުބާރާތުގެ 15 އަހަރުންދަށުގެ ޗެންޕިއަންކަން ގުރައިދޫ ސްކޫލު ހޯދައިފިއެވެ. މި މުބާރާތުގެ ޗެންޕިއަންކަން ގުރައިދޫއިން ކާމިޔާބުކުރީ ފައިނަލުގައި ރެހެންދި ސްކޫލާއި ވާދަކޮށެވެ. ފޯރިގަދަ ކުޅުމެއް ފެނުނު މި މެޗުގައި ގުރައިދޫ ސްކޫލް މޮޅުވީ ފަހު ސިކުންތުގައި ގޯލެއް ޖަހައި 10-9 ންނެވެ.

މި މުބާރާތުގެ ފައިނަލަށް ގުރައިދޫ ދަތުރުކުރީ ސެމީގައި އަހްމަދިއްޔާ ސްކޫލު ބަލިކޮށްފައެވެ. އަދި ފައިނަލަށް ރެހެންދި ސްކޫލް ދަތުރުކުރީ ސެމީގައި ހަމަދު ސްކޫލް ބަލިކޮށްފައެވެ.

މިއަހަރުގެ އިންޓަރ ސްކޫލް ހޭންޑްބޯޅަ މުބާރާތުގެ 15 އަހަރުން ދަށުގެ އަންހެން ޑިވިޝަނުގައި ޖުމްލަ 20 ޓީމަކުން ވާދަކޮށްފައިވާއިރު، މިޑިވިޝަންގެ މެޗުތައް ކުރިއަށް ގެންގޮސްފައިވަނީ ބައިވެރިވި 20 ޓީމު ފަސް ގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕަކުން ވެސް އެއްވަނަ ހޯދާ ޓީމުގެ އިތުރުން، ފަސް ގުރޫޕުން ދެވަނަ ހޯދި ޓީމުތަކުގެ ތެރެއިން އެންމެ ނަތީޖާ ރަނގަޅު ތިން ޓީމަށް ވެސް މުބާރާތުގެ ކުއާޓާ ފައިނަކުން ވަނީ ފުރުސަތު ލިބިފައެވެ.