ދައުލަތުގެ މީޑިއާ، ޕީއެސްއެމް ނިއުސްއިން ގެނެސްދިން އިނގިރޭސި ޚަބަރުގެ ސެގްމަންޓެއްގައި ބޭއަދަބީ މަންޒަރެއް ހިމެނިފައިވާތީ އެކަމަށް މަޢާފަށް އެދިއްޖެއެވެ.

މި ކަމާއި ގުޅިގެން ޕީއެސްއެމް އިން ނެރުނު ނޫސްބަޔާނުގައި ބުނެފައި ވަނީ މި މަހު 10 ވަނަ ދުވަހުގެ ރޭ 19:00 ގައި އެ ކުންފުނީގެ ޕީއެސްއެމް ނިއުސް އިން ގެނެސްދިން އިނގިރޭސި ހަބަރު ސެގްމެންޓްގައި ބޭއަދަބީ މަންޒަރެއް ހިމެނިފައިވާތީ، ދިވެހި ލޮބުވެތި ރައްޔިތުންގެ އަރިހުން މައާފަށް އެދޭކަމަށެވެ.

މިކަމަކީ ކުންފުނީގެ ކޮންޓެންޓް ޕޮލިސީއާއި އެޑިޓޯރިއަލް ޕޮލިސީއާއި ހިލާފް ސީރިއަސް މައްސަލައެއް ކަމަށާއި އެހެންކަމުން މިކަމުގައި ޝާމިލްވާ ފަރާތްތަކާއިމެދު ކުންފުނީގެ ފަރާތުން އަޅަންޖެހޭ އެންމެ ހަރުކަށި ފިޔަވަޅު އަޅާނެކަމުގައި އެ ބަޔާނުގައި ބުނެފައިވެއެވެ.

ހަމައެހެންމެ މި މައްސަލާގައި ކަންހިނގައިދިޔަގޮތް ބެލުމަށްފަހު އިހުމާލުވި 2 މުވައްޒަފަކު ސަސްޕެންޑްކޮށް ފިޔަވަޅު އަޅަންޖެހޭ ފަރާތްތަކާމެދު އިތުރަށް އަޅަންޖެހޭ ފިޔަވަޅުތައް އެޅުމަށް ކުންފުނީގެ ކަމާ ބެހޭ ކޮމިޓީއަށް ފޮނުވާފައިވާކަމަށްވެސް ޕީއެސްއެމްގެ ބަޔާނުގައި ބުންޏެވެ.

ކުންފުނީގެ އެކިއެކި ޑިޕާޓްމަންޓްތަކުގައި މިހާރު އަމަލުކުރެވެމުންދާ އެސްއޯޕީތައް އިސްލާހުކޮށް މިފަދަ ކަންކަން ތަކުރާރުނުވާނެ ގޮތަކަށް ކުންފުނީގެ އޮޕަރޭޝަނަލް ކަންކަން ތަރުތީބު ކުރަމުންދާ ކަމުގައި ވެސް އެ ބަޔާނުގައި ބުނެފައިވެއެވެ.