ރާއްޖެ އިން ބޭރުން މަތީ ތަޢުލީމު ހާޞިލުކުރަމުންދާ ދަރިވަރުންގެ ދަފްތަރުގައި ދެހާހަށްވުރެ ގިނަ ދަރިވަރުން ރަޖިސްޓްރީވެފައިވާކަމަށް މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާއި ބެހޭ ވުޒާރާއިން ބުނެފިއެވެ.

މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާއި ބެހޭ ވުޒާރާގެ ފަރާތުން އެކުލަވާލައިފައިވާ މި ދަފްތަރުގައި، 915 ފިރިހެން ދަރިވަރުންނާއި 1،201 އަންހެން ދަރިވަރުންނާއި އެކު ޖުމްލަ 2،116 ދަރިވަރުން ވަނީ މިހާތަނަށް ރަޖިސްޓްރީވެފައެވެ.

މިފަދަ ދަފްތަރެއް ޤާޢިމުކުރުމުގެ މަޤްސަދަކީ ބޭރުގެ އެކި ޤައުމުތަކުގައި މަތީ ތަޢުލީމު ހާޞިލުކުރަމުންދާ ދަރިވަރުންނާއި ގުޅޭ މުޙިއްމު ކަންކަން ބެލެހެއްޓުމުގައި ލުއިފަސޭހަކަން ހޯދުމުގެ އިތުރުން ދިވެހި ދަޢުލަތުގެ ފަރާތުން އެ ދަރިވަރުންނަށް ބޭނުންވާ އެހީތެރިކަމާއި އެއްބާރުލުން ފޯރުކޮއްދިނުންކަމަށް އެ ވުޒާރާއިން މައުލޫމާތުދެއެވެ.

ބޭރުގަިއ ކިޔަވަމުންދާ ދަރިވަރުންނަށް ލުއި ފަސޭހަކުރުމަށްޓަކައި ސަރުކާރުން ގިނަ މަސައްކަތްތަކެއް ކުރަމުން އަންނައިރު ބޭންކް އޮފް މޯލްޑިވްސްއިން ދޫކުރާ ދިވެހި ރުފިޔާގެ ޑެބިޓްކާޑު ބޭނުންކޮށްގެން ބޭރު ފައިސާ ނެގުމުގައި ދިގު މުއްދަތެއް ވާންދެން އޮތް ދަތިކަން ހައްލުކޮށް ބޭރުގައި ކިޔަވާ ދަރިވަރުންނަށް މަހަކު 1200 ޔޫ.އެސް ޑޮލަރާ އެއްވަރުގެ ޢަދަދަކަށް ބޭރު ފައިސާ ނެގޭނެގޮތަށް މިހާރުވަނީ ހަމަޖައްސާފައެވެ.

ދިވެހި ރުފިޔާ އެކައުންޓުގައި ފައިސާ ހުރިނަމަވެސް އެ ފައިސާ ބޭރު ފައިސާ އަށް ބަދަލުކުރުމުގައި ފާއިތުވީ ހައެއްކަ އަހަރު ދުވަހު، ހުރި ދަތިތަކާހެދި ކިޔެވުމާއި ދިރިއުޅުމުގެ ކަންކަން ދިޔައީ ދަރިވަރުންނަށް އިންތިހާއަށް ދަތިވަމުންނެވެ.

މި އައު ސިޔާސަތުގެ ސަބަބުން ދިވެހިރުފިޔާ ބޭރު ފައިސާއަށް ބަދަލުކުރުމުގެ ދަތިކަމާމެދު ދަރިވަރުން ވިސްނުން ދޫކޮށްލައި އެދަރިވަރުންގެ ކިޔެވުމަށް ބޮޑަށް ފޯކަސްކުރާނެ ވަގުތު ލިބޭނެކަމަށް އުއްމީދު ކުރާކަމަށް އޭރު ވުޒާރާއިން ބުންޏެވެ.