ސްޕެނިޝް ލަލީގާގައި ރޭގައި ރެއާލް މެޑްރިޑާއި ރަޔޯ ވަޔެކާނޯ ބައްދަލުކުރިމެޗުން އެއްވަރުވެ ރެއާލް އަށް ތާވަލުގެ އެއްވަނައަށް އަރަން ލިބުނު ފުރުސަތު ގެއްލުވާލައިފިއެވެ. މިމެޗު ނިމުނީ 3-3 ން އެއްވަރުވެގެންނެވެ.

މެޗުފަށައިގެން 4 ވަނަ މިނެޓުގައި ވަޔެކާނޯއިން ވަނީ ލީޑުގާފައެވެ. މިގޯލް ކާމިޔާބުކޮށްދިނީ ލޮޕޭޒްއެވެ. އަދި އެޓީމުން ވަނީ 36 ވަނަ މިނެޓުގައި އިތުރުގޯލެއްޖަހައި ލީޑު ފުޅާކޮށްދީފައެވެ. މިގޯލު ކާމިޔާބުކޮށްދިނީ މޫމިންއެވެ. ނަމަވެސް ރެއާލްއިން ވަނީ ފުރަތަމަ ހާފު ނިމުމުގެ ކުރިން 2 ގޯލު ޖަހައި ނަތީޖާ ހަމަކޮށްފައެވެ. އެގޮތުން ފުރަތަމަ ގޯލު 39 ވަނަ މިނެޓުގައި އޭރިޔާގެ ބޭރުން ފޮނުވާލީ އުންޑައަކުން ކާމިޔާބުކުރީ ވަލްވާޑޭއެވެ. އަދި ފުރަތަމަ ހާފުގެ ފަހު މިނެޓުގައި ނަތީޖާ ހަމަކޮށްދިނީ ފަހު މިނެޓުގައި ބެލިންގްހަމް ބޮލުންޖަހައިދިން ގޯލަކުންނެވެ.

ދެވަނަހާފު ފެށިގެން މާގިނައިރުތަކެއް ނުވެ ފަހަތުން އަރައި ރެއާލްއިން ލީޑުނެގިއެވެ. މިގޯލު ކާމިޔާބުކޮށްދިނީ 56 ވަނަ މިނެޓުގައި ރޮޑްރީގޯއެވެ. ނަމަވެސް އޭގެ 10 މިނެޓުފަހުން އަނެއްކާވެސް ވަޔެކާނޯވަނީ އިތުރު ގޯލެއްޖަހައި ނަތީޖާ ހަމަކޮށްދީފައެވެ.

ރޭގެ މެޗުގައި އަނިޔާގެ ސަބަބުން އެމްބާއްޕޭ ކުޅުމާއި ދުރުގައި ހުރިއިރު، ވިނީޝިއަސް ކުޅެން އަރުވާފައިވަނީ ދެވަނަ ހާފުގައެވެ.

ރޭގޭ މެޗުން އެއްވަރުވުމުން ރެއާލް މެޑްރިޑް އޮތީ 37 ޕޮއިންޓާއެކު ތާވަލުގެ 2 ވަނައިގައެވެ. 1 ވަނައިގައި 38 ޕޮއިންޓާއެކު ބާސެލޯނާ އޮތްއިރު، އެއްމެޗު މަދުން ކުޅެ 35 ޕޮއިންޓާއެކު 3 ވަނައިގައިއޮތީ އެތްލެޓިކޯ މެޑްރިޑެވެ.