ސްޕެއިންގެ ލަލީގާގައި ބާސެލޯނާއިން ރެއަލް ވަލަލޮއިޑްގެ މައްޗަށް ހަތް ލަނޑުން މޮޅުވެއްޖެއެވެ.

ރާއްޖެ ގަޑިން އަށެއް ޖެހިއިރު، ރޭ ކުޅުނު މި މެޗުގައި ބާސެލޯނާ އިން ވަނީ މޮޅު ކުޅުމެއް ދައްކާފައެވެ. އެ މެޗުގައި ބާސެލޯނާގެ ގޯލުތައް ޖެހީ ރަފީނިއާ، ލެވަންޑޯސްކީ، އޮލްމޯ އަދި ފެރާން ޓޮރޭޒް އެވެ.

އެގޮތުން މެޗު ފަށައިގެން ވެސް ރަނގަޅު ކުޅުމެއް ބާސެލޯނާއިން ކުޅުނުއިރު، މެޗުގެ ފުރަތަމަ ގޯލު ޖެހީ އެ މެޗުގައި މޮޅު ކުޅުމެއް ދައްކައި ހެޓްރިކް ހެދި، ބްރެޒިލްގެ ފޯވާޑް ރަފީނިއާއެވެ. އޭނާ އެ ގޯލު ޖެހީ އަރަމުން އަންނަ ހުނަރުވެރި އަދި ޒުވާން ޑިފެންޑަރު، ޕައު ކުބާސީގެ ހިތްގައިމު އެސިސްޓަކުންނެވެ. އެ ގޯލު ޖެހީ މެޗުގެ 20 ވަނަ މިނެޓުގައެވެ.

އޭގެ ފަހުން، ފުރަތަމަ ހާފު ނިމުމުގެ ކުރިން ބާސެލޯނާ އިން ދެ ގޯލު ޖެހިއެވެ. އެގޮތުން ދެވަނަ ގޯލު ލެވަންޑޯސްކީ ޖެހީ، ހުނަރުވެރި އަދި ޒުވާން ކުޅުންތެރިޔާ ލަމީން ޔަމާލްގެ ހިތްގައިމު އެސިސްޓަކުންނެވެ. ބާސެލޯނާގެ ތިން ވަނަ ގޯލު ޖެހީ ފުރަތަމަ ހާފު ނިމެން ކައިރިވެފައިވަނިކޮށް، ލިބުނު ކޯނަރެއްގައި ފްރާންސްގެ ޑިފެންޑަރު ޖޫލްސް ކުންޑޭއެވެ.

މެޗުގެ ދެވަނަ ހާފު ވެސް ބާސެލޯނާ އިން ފެށީ ރަނގަޅު ކުޅުމެއް ދައްކަމުންނެވެ. އެގޮތުން މެޗުގެ 64 ވަނަ މިނެޓުގައާއި، 72 ވަނަ މިނެޓުގައި ދެ ގޯލު ޖަހައިގެން ރަފީނިއާ އޭނާގެ ހެޓްރިކް ފުރިހަމަ ކުރިއެވެ. މި ދެ ގޯލުގައި ވެސް ހުނަރުވެރި ލަމީން ޔަމާލްގެ ދައުރު ވަރަށް ބޮޑެވެ.

އޭގެ ފަހުން ބާސެލޯނާގެ ހަވަނަ ލަނޑު ޖަހައިދިނީ މި ސީޒަނުގައި އެ ޓީމަށް ބަދަލުވި، ސްޕެއިންގެ ހުނަރުވެރި މިޑްފީލްޑަރު ޑެނީ އޮލްމޯއެވެ. އަދި ބާސެލޯނާގެ ހަތް ވަނަ ލަނޑު ޖަހައިދިނީ ރަފީނިއާ ނަގައިދިން ރީތި ބޯޅައަކުން ފެރާން ޓޮރޭޒްއެވެ.

މިއާއެކު ބާސެލޯނާ އިން ތާވަލުގެ އެއްވަނައިގައި އޮތީ މި ސީޒަނުގައި ކުޅުނު ހަތަރު މެޗުން މޮޅުވެ، ހޯދި 12 ޕޮއިންޓާއެކުއެވެ. މި ސީޒަނުގައި އަދި ޕޮއިންޓެއް ނުގެއްލޭ ހަމައެކަނި ޓީމުގެ ގޮތުގައި ބާސެލޯނާ އޮތް އިރު، އެ ޓީމުން ވަނީ މި ސީޒަނުގައި ކުޅުނު 4 މެޗުގައި 13 ގޯލު ޖަހައިފައެވެ. އެ ޓީމުގެ ކޮޅަށް ވަދެފައިވަނީ އެންމެ ތިން ގޯލެވެ.

ބާސެލޯނާއިން މި ސީޒަނުގައި ރަނގަޅު ކުޅުމެއް ދައްކަމުންއަންނައިރު، އެ ޓީމުގެ އައު ކޯޗު، ހަންސީ ފްލިކުގެ ދަށުން ބާސެލޯނާއިން ކުޅެނީ ތަފާތު ކުޅުމެކެވެ. އާންމުކޮށް ބާސެލޯނާއިން ކުޅޭ "ޓިކިޓަކަ" ވެސް ހިމެނޭ ގޮތުން، މި ސީޒަނުގައި ބާސެލޯނާ އިން ކުޅެނީ ފްލިކުގެ މަޝްހޫރު "ހައި އިންޓެސިޓީ" ކުޅުމެކެވެ. އެ ކުޅުމުގައި ބާސެލޯނާއިން ބޯޅަށް ގެއްލުމުން، ހޯދުމަށް އިތުރަށް ޕްރެސްކޮށް، އެޓޭކުގައި ގިނަ ކުޅުންތެރިން ވެސް ބައިވެރިވެއެވެ.