ސްޕެނިޝް ލަލީގާގައި ރޭ ކުޅުނު ފޯރިގަދަ މެޗުގައި، މެޗުގެ އެންމެ ފަހު ސިކުންތުކޮޅުގެ ތެރޭގައި ހެކްޓަރ ބެލެރިން ޖެހި ލަނޑުން ރެއާލް ބެޓިސް އިން ރެއާލް މެޑްރިޑް 1-1 އިން ހިފަހައްޓައިފިއެވެ. މި ނަތީޖާއާއެކު ތާވަލުގެ އެއްވަނައިގައި އޮތް ބާސެލޯނާއަށް ލީގު ކާމިޔާބުކުރުމުގެ ފުރުސަތު މިހާރު ވަނީ ވަރަށް ބޮޑަށް ތަނަވަސްވެފައެވެ.

އެސްޓާޑިއޯ ލަ ކާޓޫހާގައި ކުޅުނު މި މެޗުގައި ފުރަތަމަ ލަނޑު ޖަހައި ކުރިހޯދީ ރެއާލް މެޑްރިޑުންނެވެ. މެޗުގެ 17 ވަނަ މިނެޓުގައި މި ލަނޑު ކާމިޔާބުކޮށްދިނީ ވިނީޝިއަސް ޖޫނިއަރއެވެ. މިއީ ފެޑެރިކޯ ވަލްވާޑޭ ފޮނުވާލި ބާރު ހަމަލާއެއް ބެޓިސްގެ ކީޕަރު އަތުގައި ޖެހިފައި ނުކުތް ވަގުތު، ރީބައުންޑަށް އެންމެ އަވަހަށް އިޖާބަދީގެން ވިނީޝިއަސް ކާމިޔާބުކުރި ލަނޑެކެވެ. މިއީ ރެއާލް މެޑްރިޑަށް 100 ވަނަ މެޗު ކުޅެދިން ކީލިއަން އެމްބާޕޭއަށް ލިބުނު ފުރުސަތެއް ބޭކާރުވީ ފަހުން ފެނިގެންދިޔަ ލަނޑެކެވެ.

Ad by Hajj Corporation

ފުރަތަމަ ހާފު ނިމުމުގެ ކުރިން ބެޓިސްއިން ވަނީ މެޑްރިޑުގެ ގޯލަށް ބާރުބޮޑުކޮށްފައެވެ. ނަމަވެސް މެޑްރިޑުގެ ކީޕަރު އެންޑްރީ ލުނިން ވަނީ އެންޓަނީ އާއި ސެޑްރިކް ބަކަމްބޫ ފޮނުވާލި ނުރައްކާތެރި ހަމަލާތައް ހުށިޔާރުކަމާއެކު ދިފާއުކޮށްފައެވެ. ދެވަނަ ހާފުގައި އެމްބާޕޭ ލަނޑެއް ޖެހި ނަމަވެސް، ޓްރެންޓް އެލެކްސެންޑަރ-އާނޯލްޑް އޮފްސައިޑްގައި ހުރުމުން ރެފްރީ އެ ލަނޑު ބަލައެއް ނުގަތެވެ.

މެޗު ނިމެން ދަނިކޮށް، އިތުރު ވަގުތުގެ 94 ވަނަ މިނެޓުގައި ބެލެރިން ފޮނުވާލި ބޯޅަ މެޑްރިޑުގެ ކުޅުންތެރިއެއްގެ ގައިގައި ޖެހިފައި ގޯލުގެ ތެރެއަށް ވަނީ ލުނިންއަށް އެއްވެސް ފުރުސަތެއް ނުދީއެވެ. މި ލަނޑު ޖެހުމުގެ ކުރިން ފާލަންޑް މެންޑީއަށް ފައުލްކުރި ކަމަށް ބުނެ މެޑްރިޑުގެ ކުޅުންތެރިން ޝަކުވާ ކުރި ނަމަވެސް ރެފްރީ ނިންމީ އެއީ ސައްހަ ލަނޑެއް ކަމަށެވެ.

ތަފާސްހިސާބުތަކަށް ބަލާއިރު، މިއީ ރެއާލް މެޑްރިޑުން ލީގުގައި ޖެހިޖެހިގެން ކްލީން ޝީޓެއް ނުލިބި ނިންމާލި 10 ވަނަ މެޗެވެ. މިއީ 2004 ވަނަ އަހަރުގެ ފަހުން އެ ޓީމުން ލީގުގައި ދެއްކި އެންމެ ދަށް ފަހަތުގެ ކުޅުމެވެ. އަނެއްކޮޅުން ބެޓިސްއަކީ މި ސީޒަނުގައި ބަލިވަމުން ދަނިކޮށް އެންމެ ގިނަ ޕޮއިންޓް (15 ޕޮއިންޓް) ހޯދި ދެވަނަ ޓީމެވެ.

މި ނަތީޖާއާއެކު، ހޮނިހިރު ދުވަހު ގެޓާފޭއާ ދެކޮޅަށް ކުޅޭ މެޗުން ބާސެލޯނާ މޮޅުވެއްޖެނަމަ، ތާވަލުގެ ކުރީގައި އެ ޓީމަށް 11 ޕޮއިންޓުގެ ލީޑެއް ލިބޭނެއެވެ. މިއީ އަލްވާރޯ އަރްބެލޯއާގެ އިރުޝާދުގެ ދަށުން ކުޅޭ ރެއާލް މެޑްރިޑަށް ލީގު ރޭހުގައި ކުރިމަތިވި ވަރަށް ބޮޑު ގޮންޖެހުމެކެވެ.