ބާސެލޯނާ (ސްޕެއިން): ސްޕެނިޝް ލަލީގާއި 5-1 ގެ ނަތީޖާއަކުން ސެވިއްޔާ ބަލިކޮށް ކުރިޔަށް އޮތް 2 މެޗުގައި ބާސެލޯނާއި ދެކޮޅަށް ކުޅޭ ދެ ޓީމް ކަމުގައިވާ ބަޔާން މިޔުނިކާއި ރެއާލް މެޑްރިޑަށް ވަރުގަދަ މެސެޖެއްދީފިއެވެ. މި މެޗަށް ކުރިމަތިލިއިރު ބާސެލޯނާ ވަނީ އެންމެ ފަހުން ކުޅުނު 5 މެޗުގައި 16 ގޯލް ޖަހައިފައެވެ. އަދި ސެވިއްޔާ އާއި ބާސެލޯނާއާއި ދެމެދު ކުޅުނު 8 މެޗުގައިވެސް ސެވިއްޔާއަށް ބާސެލޯނާ ބަލިކުރެވިފައި ނުވެއެވެ. އަދި މި ސީޒަނުގައި ލީގުގައި އަވޭ މެޗަކުން ސެވިއްޔާ މޮޅުވެފައި ނުވެއެވެ.

ބާސެލޯނާގެ އަމިއްލަ ދަނޑުގައި ކުޅުނު މި މެޗުގައި ފުރަތަމަ ގޯލް ޖެހީ 24 ވަނަ މިނެޓުގައި ރަފިންހާ އަށް ކުރި ފައުލަކާއި ގުޅިގެން ލިބުނު ޕެނަލްޓީއަކުން ހުނަރުވެރި ފޯވާޑް ލެވަންޑޮވްސްކީ އެވެ. ދެވަނަ ގޯލް ޖެހީ ޕެޑްރީއެވެ. 3 ވަނަ ގޯލް ޖެހީ އަނެއްކާވެސް މި މުބާރާތުގެ އެންމެ ގިނަ ގޯލް ޖަހާފާއިވާ ކުޅުންތެރިޔާ ލެވަންޑޮވްސްކީ އެވެ. މި ގޯލާއެކު މި މުބާރާތުގައި ލެވަންޑޮވްސްކީ ވަނީ ޖުމުލަ 12 ގޯލް ޖަހާ، ގޯލް ޗާޓުގެ އެއްވަނައިގައި ހަމަޖެހިލާފައެވެ. ބާސެލޯނާގެ 4 އަދި 5 ވަނަ ގޯލް ޖަހައިދިނީ ދެވަނަ ހާފުގެ 76 ވަނަ މިނެޓުގައި ބަދަލުކުޅުންތެރިއެއްގެ ގޮތުގައި އެރި އެޓީމްގެ ޒުވާން ސްޕެނިޝް ފޯވާޑް ޕަބްލޯ ޓޯރޭ އެވެ.

Ad by Hajj Corporation

ސެވިއްޔާގެ ހަމައެކަނި ގޯލް ޖަހައިދީފައިވަނީ އެޓީމުގެ 19 އަހަރުގެ ފޯވާޑް ބެލްޖިއަމްގެ ސްޓެނިޝް އިޑުމްބޯ އެވެ.   

މި މެޗުގައި އެންމެ ފާހަގަކޮށްލެވޭ ކަމަކީ އަނިޔާގެ ސަބަބުން ކުޅުމާދުރުގައިހުރި ބާސެލޯނާގެ އުއްމިދީ މިޑްފީލްޑަރ ގަވީ 349 ދުވަސްފަހުން އަނބުރާ ދަނޑަށް ކުޅެން ނިކުތުމެވެ.

މި މޮޅާއެކު ބާސެލޯނާއި ވަނީ ސްޕެނިޝް ލަލީގާ ގައި ރެއާލް މެޑްރިޑް ގެ މައްޗަށް ދަމަހަށްޓަމުން އައި 3 ޕޮއިންޓް ގެ ލީޑު އެގޮތުގައި ހިފަހަށްޓާލާއި ޓޭބަލް ގެ އެއް ވަނަގައި ހަމަޖެހިލާފައެވެ. މި ސީޒަންގައި ޔޫރަޕުގެ ގަދަ 5 ލީގު ތެރެއިން ޓީމަކުން އެންމެ ގިނަ ގޯލް ޖަހާފައި ވަނީވެސް ބާސެލޯނާކަން ފާހަގަކުރެވެއެވެ.

މި މޮޅާއެކު ބާސެލޯނާއި ވަނީ އެޓީމު ދެން ވާދަކުރަން ހަމަޖެހިފައިވާ ބަޔާން މިޔުނިކް އަދި ރެއާލް މެޑްރިޑަށް ވަރުގަދަ މެސެޖެއް ދީފައެވެ. ބަޔާން އިން ވަނީ މީގެ ކުރިން ޗެންޕިއަންސް ލީގުގައި 8-2 ގެ ނަތީޖާއަކުން ބާސެލޯނާ ލަދުގަންނަވާލާފައެވެ. އަދި ހަމަ މިގޮތަށް މިދިޔަ ސީޒަންގައި ބާސެލޯނާއިން މެޑްރިޑާ ދެކޮޅަށް ކުޅުނު 3 މެޗުންވެސް ވަނީ ބަލިވެފައެވެ. އެހެން ނަމަވެސް ޒުވާން ސްކޮޑަކާއެކު ސީޒަންނަށް ތައްޔާރުވެފައިވާ ބާސާއިވަނީ މި މެސެޖާއެކު އެޓީމަކީވެސް ޔޫރަޕްގެ ބޮޑެތި ޓީމުތަކާ ވާދަކުރެވޭވަރުގެ ޓީމެއްކަން ސާބިތުކޮށްދީފާއެވެ.