ސްކޫލްތަކުގެ ކުދިން ބައިވެރިކޮށްގެން ދައުލަތުގެ އެއްވެސް އިދާރާއަކުން ހަރަކާތެއް ހިންގާ ނަމަ އެ ހަރަކާތަކަށް ހުއްދަ ހޯދުމަށް އެޑިއުކޭޝަން މިނިސްޓްރީން އަންގައިފި އެވެ.

ސްޓޭޓް މިނިސްޓަރު އަހުމަދު މުހައްމަދު ސޮއިކުރައްވައި ސަރުކާރުގެ ހުރިހާ އިދާރާއަކާއި ސިޓީ އަދި ލޯކަލް ކައުންސިލްތަކާއި ކްލަބް ޖަމިއްޔާ، ޖަމާއަތްތަކަށް އިއްޔެ ފޮނުއްވި ސާކިއުލާއެއްގައި ވަނީ ސްކޫލްތަކުގައި ހިންގާ ހަރަކާތްތަކަކީ ދުރާލައި، ރާވައިގެން ވަކި އިންތިޒާމެއްގެ ތެރެއިން ކުރިއަށް ގެންދާ ހަރަކާތަކަށް ހެދުމަށް ކޮންމެ އަހަރެއްގެ ދިރާސީ އަހަރުގެ ކަލަންޑަރާ އެއްގޮތަށް އެކްޓިވިޓީ ކަލަންޑަރު ވެސް ތައްޔާރުކުރާ ކަމަށެވެ

ސާކިއުލާގައިވަނީ ދައުލަތުގެ އިދާރާތަކުން ހިންގާ އެއްވެސް ހަރަކާތެއެގައި ސކޫލް ކުދިން ބައިވެރި ކުރާނަމަ އެ ކަމެއް ސްކޫލްތަކުގެ އެކްޓިވިޓީ ކަލަންޑަރުގައި އެ ހަރަކާތެއް ހިމަނާފައި އޮންނަން ޖެހޭ ކަމަށެވެ.

"އަދި މި ފަދަ ހަރަކާތެއް ހިންގާއިރު ދަރިވަރުންގެ ކިޔެވުމަށް އެއްވެސް ބުރޫއެއް ނާރާނެ ގޮތަކަށް އެ ހަރަކާތެއް ހިންގުމަށްވެސް އެޑިއުކޭޝަން މިިނިސްޓްރީއިން ވަނީ އެދިފައެވެ. މިފަދަ ހަރަކާތްތަކާ ގުޅޭގޮތުން ސްކޫލްތަކާ މުއާމަލާތް ކުރައްވަން ވާނީ މިނިސްޓްރީގެ ހުއްދަ ހޯއްދެވުމަށް ފަހު ކަމަށް ވެސް ދަންނަވަމެވެ،"

މިގޮތަށް އެންގި ސަބަބަކީ ސްކޫލްގެ އެކްޓިވިޓީ ކަލަންޑަރުގައި ކަންކަން ނުހިމަނައި ނުވަތަ މިނިސްޓްރީއާ އެކު، އެކަށީގެންވާ ގޮތަކަށް މަޝްވަރާ ކުރުމެއް ނެތި ސްކޫލްތަކަށް ހުޅުވާލައިގެން އެކިއެކި ހަރަކާތްތަކާއި މުބާރާތްތައް ބައެއް އިދާރާތަކުން ރާވަމުން ގެންދާތީ ކަމަށްވެސް މިނިސްޓްރީއިން ވަނީ އަންގާފައެވެ.

އެގޮތަށް ހަރަކާތްތައް ކުރިއަށް ގެންދިއުމުން ކުދިންގެ އުނގެނުމަށާއި ޓީޗަރުންނާއި ކުދިންގެ ނަފްސާނީ އަދި ޖިސްމާނީ ދުޅަހެޔޮކަމަށް އަސަރު ކުރާ ކަމަށް މިނިސްޓްރީން ބުނެފައިވެއެވެ

ދުރާލައި ސްކޫލުން ރާވާފައި ހުންނަ ހަރަކާތްތަކަށް ބުރޫއަރައި ކުއްލިއަކަށް ރާވާ ހަރަކާތްތަކުގެ ސަބަބުން ސްކޫލާއި ބެލެނިވެރިންނަށް މާލީ ބުރައަކަށްވެ، ސްކޫލް ތެރޭގައި ނުތަވަސްކަން އުފެދޭ ކަމަށް ވެސް ސާކިއުލާގައި ވެ އެވެ.