2025 ގެ ނިޔަލަށް މާލޭގެ ހުރިހާ ޕަމްޕްސްޓޭޝަންއެއްގައި ވައިސާފުކުރާ ނިޒާމް ހަރުކޮށް ނިންމުމަށް އަމާޒުހިފާފައިވާކަމަށް އެމްޑަބްލިއުއެސްސީގެ މެނޭޖިން ޑިރެކްޓަރު އަބްދުލް މަތީން މުހައްމަދު ވިދާޅުވެއްޖެއެވެ.

އެމްޑީ މަތީން މިފަދައިން ވިދާޅުވީ ވަކި ހިސާބުތަކުގައި ހުރި ޕަމްޕްސްޓޭޝަންތަކުގައި ވައިސާފުކުރާ ނިޒާމް ހަރުކޮށް ނިންމާއިރު އަނެއްބައި ހިސާބުތަކުގައި ހަރު ނުކުރަނީތޯ ސޯޝަލް މީޑިއާގައި ކުރަމުންދާ ސުވާލުތަކަށް ދެއްވި ޖަވާބުގައެވެ.

އެމްޑީ ވިދާޅުވީ މާލޭގެޕަމްްޕް ސްޓޭޝަތަކުން ބޭރުކުރާ ވައިސާފުކުރުމަށް މި އަހަރު ފެށުނު މި މަސައްކަތުގެ ދަށުން މިހާރު 2 ޕަމްޕްސްޓޭޝަންއެއްގައި މި ނިޒާމު ހަރުކޮށް ބޭނުންކުރެވެމުން އެބަދާކަމަށާއި 2025 ގެ ނިޔަލަށް މަސައްކަތް ނިންމާލެވޭނެކަމަށެވެ.

އެމްޑީ ވިދާޅުވީ މިހާރު ބެހެއްޓިފައިވާ 2 ނިޒާމުން ވައިސާފު ކުރަނީ 2 ބާވަތެއްގެ މެޓީރިއަލްއަކުން ކަމުގައިވާތީ އޭގެތެރެއިން މާލޭގެ މާހައުލަށް ރަގަޅީ ކޮންބާވަތެއްތޯ ދެނެގަތުމަށް 2 ނިޒާމުވެސް ދަނީ މޮނިޓަރ ކުރަމުންކަމަށެވެ. މިގޮތުން އެއްކުރެވޭ މަޢުލޫމާތު އެހެން ޕަމްޕް ސްޓޭޝަންތަކުގެ ވައިސާފުކުރާ ނިޒާމު ޤާއިމުކުރުމުގައި ބޭނުންކުރެވޭނެކަމަށް ވިދާޅުވިއެވެ.

މާލޭގައި އެމްޑަބްލިއުއެސްސީއިން ބަހައްޓާފައި ހުރި ޕަމްޕް ސްޓޭޝަންތަކުން ދުވާ ވަސް ކޮންޓްރޯލް ކުރުމަށް ހާއްސަ ސިސްޓަމެއް އެންމެ ފުރަތަމަ ބަހައްޓާފައިވަނީ މާފަންނު ބުރުޒުމަގުގައި ހުންނަ 4 ނަމްބަރު ޕަމްޕް ސްޓޭޝަންގައި މިއަހަރުގެ ޖުލައިމަހުގެ ތެރޭގައެވެ.