ބާސެލޯނާގެ ކުޅުން ދަށްވެ އަނެއްކާވެސް ހިތްދަތިކަމާ ކުރިމަތިލާން ޖެހިއްޖެއެވެ. ރޭގައި ސެޕްނިޝް ލަލީގާގައި ރެލިގޭޝަނުގައި އޮތް ލެގަނޭސް އާއި ވާދަކޮށް މެޗު ނިމުނީ 0-1 ން މެޗުން ބަލިވެގެންނެވެ.

މިމެޗުގައިވެސް ފަހަކަށް އައިސް ބާސެލޯނާގެ ފަރާތުން ފެނިފައިވާ ދަށްކުޅުން ތަކުރާރުވިއެވެ. އެގޮތުން ރޭގެމެޗުގައި ބާސެލޯނާގެ މެދުތުރޭގައި ޕެޑްރީ ފިޔަވައި ހުރިހާ ކުޅުންތެރުންގެ ކުޅުތެރިންގެ ފެނުނީ ދަށްކޮށެވެ. ޑިފެންސް ލައިނުން ފަހަކަށް އައިސް ހެދޭ ގޯސްތައް ރޭގައިވެސް ވަނީ ތަކުރާރުވެފައެވެ. އެގޮތުން މެޗުގެ 4 ވަނަމިނެޓުގައި ލެގަނޭސް އަށް ލިބުނު ކޯނަރަކުން އޭރިޔާތެރޭގައި ހުސްކޮށްހުރެ ގޯލުޖަހައިދިނީ އޮސްކާ ރޮޑްރީގޭޒްއެވެ.

މެޗުގައި ބޯޅަކޮންޓްރޯލްކޮށްގެން ގިނަވަގުތު ކުޅުނު ބާސެލޯނާގެ ފޯވާޑް ލެވަންޑޮވްސްކީ އަށް ފުރަތަމަ ހާފުގައިވެސް ދެ ފުރުސަތެއް ހުސްކޮށް ލިބި ބޭނުންކުރެވޭ ގޮތެއް ނުވިއެވެ. އަދި މުޅިމެޗުގައި ވަރުގަދަ ޑިފެންސް ކުޅުމެއް ކުޅުނު ލެގަނޭސްގެ ޑިފެންސް ފޫއަޅުވާލުމަށް ބާސެލޯނާއިން ފޮނުވާލި ގިނަހަމަލާތަކުގެ ދިފާއަކަށްވީ ރޭގެ މެޗުގެ މޮޅުކުޅުންތެރިޔާ ލެގަނޭސް ގެ ކީޕަރެވެ.

މިފަހަކަށް އައިސް ބާސެލޯނާގެ ހުރިހާ ޑިޕާޓްމަންޓްތަކުން ފެންނަނީ ދަތެއްނެތް ދަށް ކުޅުމެކެވެ. މީގެއިތުރުން ރޭގެ މެޗުތެރެއިން ބާސެލޯނާގެ ފޯވާޑް ފާރމިން ލޮޕޭޒްގެ ދަތްވަނީ ވެއްޓިފައެވެ. އަދި މިދިޔަ ހަފްތާގައި ރެއާލް ބެޓިސް މެޗުގައި ބާސެލޯނާގެ ޑެނި އޮލްމޯގެ ދަތްވެސް ވަނީ ވެއްޓިފައެވެ.

ބާސެލޯނާގެ ދަތްވެއްޓުނު ދެ ކުޅުންތެރިން

ބާސެލޯނާ އެންމެފަހުން ލީގުގައި ކުޅުނު 6 މެޗުން މޮޅުވީ އެންމެ މެޗަކުންނެވެ. އަދި މި 6 މެޗުގައި 18 ޕޮއިންޓުގެ ތެރެއިން ލިބުނީ އެންމެ 6 ޕޮއިންޓެވެ. ބާސެލޯނާ މިވަގުތު ތާވަލުގެ އެއްވަނައިގައި އޮތަސް އެއްމެޗު މަދުން ކުޅެފައިވާ އެތްލެޓިކޯ މެޑްރިޑާއި ރެއާލް މެޑްރިޑް އަށް އެމެޗުތަކުން މޮޅުވެ ތާވަލުގައި ބާސެލޯނާއަށްވުރެ ކުރިޔަށް އެރުމުގެ ފުރުސަތު މިހާރުވަނީ ލިބިފައެވެ.